Fur-ah pawh buhfai a harsatlohna turin FCI leh State sawrkar in hma an la dawn

Zonuna Kawlni (LENKAWL) • March 9, 2022 • Comments • Mizoram

Food Corporation of India (FCI), Mizoram State Consultative Committee Chairman leh Mizoram Rajya Sabha MP K. Vanlalvena chuan, Fur khawchhiat lai pawhah mipui te'n buhfai ei turah harsatna an tawh loh nan FCI leh State sawrkarin tangrualin hma a la dawn tih a sawi.

Mizoram State Consultative Committee on FCI chuan nimin khan Aijal Club-ah thutkhawm neiin hemi hnua thuthar thehdarhtute a kawmnaah Rajya Sabha MP ni bawk K. Vanlalvena chuan, Mizo mipui te'n Fur-ah pawh buhfai-ah harsatna an tawh loh nan hmalak an tum thu leh FCI Mizoram-in Office hran a neih theih nan hmalak a ngai an tih thu a sawi a. Rajya Sabha MP chuan Mizoram in thla khata buhfai a mamawh chu quintal nuai khat chuang a nih laiin FCI-in man tlawma buhfai a lei theih chu quintal sing 5 chauh a nih thu a sawi a, a bak chu FCI-ah hian man to zawka lei a ngai tih sawiin, hemi avang hian State sawrkarin Open Market-in mimal buhfai a lei a ngaih phah tih a sawi a ni.

FCI-in harsatna an tawh te sawi tel bawkin K. Vanlalvena chuan, Bairabi Rel Station huamchhungah kawngpui a that tawk loh avangin buhfai phur Truck lian te'n harsatna an tawk a, hemi avang hian huntiam chhungin Rel atangin buhfai an lakchhuah hman loh chang a awm thin a, hei hi Railway te hmalak that loh vang a ni tiin, Parliament-ah auchhuahpui a tum hial thu a sawi bawk.

Zawhna chhangin FCI hotute chuan FCI Kudam tinah weight bridge dah a ni a, weight bridge siamtu company-a thawktute'n kumtin vawikhat an endik ziah thin a, Mizoram sawrkar Legal Metrology te'n an enpui thin tih an sawi a, buhfai buk dik tak sem a nih theih nan uluk taka endik thin a nih thu an sawi bawk.

FCI hotute chuan FCI Mizoram-a FCI kudam hrang hranga buhfai dah mek dinhmun sawiin, Tanhril kudam-ah buhfai Quintal 13,100, Kolasib-ah quintal 18,980, Bualpui-ah quintal 9,670, Lunglei-ah quintal 13,190, Bairabi-ah quintal 27,888 leh Lawngtlai kudam-ah quintal 19,790 a awm mek tih an sawi a, Mizoram puma FCI Kudam-a buhfai dah mek chu quintal 1,02,650 a nih thu an sawi bawk.