Mizoram Governor in SBI Mizoram hotute a kawm

Mizoram Governor Hari Babu Kambhampati chuan nimin khan State Bank of India (SBI), Mizoram hotute chu Raj Bhavan-ah kawmin an hmalakna tur pawimawh hrang hrang a sawipui.

He inkawmna ah hian SBI aiawhin Regional Manager LP. Lalchangkima leh a thawhpui te telin Mizoram mipuite hnena Bank tangkaina leh mawhphurhna te uar zawka zirtirna pek a tulna te leh Social Security Scheme hrang hrang dil theih te chungchang sawi uar a tul dan te sawiho a ni a. Mizoram sum thawhchhuah ti pung tura Entrepreneur te pawimawh na leh Bank awlsam zawka an dawr theih a pawimawh chungchang pawh sawiho a ni.

He hunah hian Governor chuan Mizoram Bank zinga hruaitu leh Bank lian ber SBI in Mizoram hmun hrang hranga mipui rawngbawlna huang a zauh mek chu lawmawm a tih thu a sawi a. SBI bik chuan Central Sawrkar hnen atanga dawn theih Scheme tha tak tak te kalpui kawngah leh Insurance Scheme tangkai tak tak a kalpui kawngah te a thawk tha thawkhat tih a sawi a. Hetihlai hian Mizoram mipui tam zawkin Bank hnathawh leh Bank tangkaina kan la hrechiang tawk lo tih sawiin, SBI chu Lead Bank a nih anga hmahruaitu ni tur leh he zirtirna kalpui kawngah theihthawp chhuah turin a duh tih a sawi bawk.

Governor chuan Mizoram hmun hrang hrang a tlawh tawh thu pawh sawiin, sawrkar hotute, Kohhran hruaitute leh tlawmngai pawl hruaitute pawh a kawm thin tih a sawi. Heng hunah te hian Mizoram chhungah Central Social Security Scheme leh Insurance Scheme tha tak tak te Mizoram mipuiin an dawng em tih chungchangte a lo chik thin a. Pawl hruaitute leh mi vengva zawk a ngaih te pawn heng Scheme hi an la hmelhriat chiang lo tih a hmuhchhuah thu Bank hotute hnenah hian a sawi a. Hei vang hian Bank tam zawk chuan an customer te hnenah hamthatna awm thei te an sawifiah tawk lo thin tih a chiang hle a ni, a ti a. Scheme tha tak tak PMSBY, PMJJBY, APY, PMJY, SUI, etc atanga hamthatna Mizoram mipui tam zawkin an dawnglo chu pawi a tih thu sawiin, Bank hnathawkte tan nasat a la ngai tih a sawi a ni.

Tunah hian SBI, Mizoram chuan Branch 46, CSP 27 leh ATM Booth 106 an nei mek a, Saving Bank leh Current Accounts belhkhawm 3,20,357 enkawl bawkin December 2021 thleng khan cheng vbc. 5,319.38 an lalut a, cheng vbc. 2,264.26 an puktir thung a ni. December 2021 thleng khan Mizoram-a Bank hrang hranga sum dahluh zawng zawng zat atanga chhutin 39.58% chu SBI in a lalut a; Loan leh thil danga puk chhuahtir zawng zawng zat atanga chhuta 33.48% chu an pekchhuah niin Priority Sector-a pawisa puktir zawng zawng zinga 30.16 % pawh SBI pekchhuah a ni bawk a ni bawk.