Grape atang Wine siam chungchang zirchiang

Horticulture Department changtu Chief Minister Zoramthanga chuan Grape tharchhuah atanga Wine siamchhuah chungchang chu a zirchiangtu Sub-Committee ten sawrkarah report an pek hunah engtia kalpui tur nge tih an ngaihtuah dawn tih a sawi.

Assembly Session nimin a chhunzawmah Congress Legislature Party Leader Zodintluanga zawhna leh member dangte zawh belhna chhangin Chief Minister chuan, Champhai leh Hnahlan-a Grape tharchhuah atanga Wine siamchhuah ah alcoholic content chu rin aiin a sang a, a ruih theih angreng viau tih a sawi a, “Lehlam ah kan prohibition kalpui nen, alcoholic content lo sang viau bawk nen, khami siamrem dan kha a awm em tih tunah chuan kan thlir mek lai a ni,” a ti a, hemi zirchiang tura an tih Sub-Committee ten sawrkarah report an thehluh hunah engtia kalpui tur nge chi nge tih an ngaihtuah dawn tih a sawi a ni.

Chief Minister chuan, khawchhak lama Sapthei chingtute tana sawrkar hmalakna te sawi bawkin, kum 2019-2020 khan SEDP hnuaiah Ngur leh Mualkawi-ah te Sapthei chin kalpui a nih thu a sawi a. Heng khaw pahnih ah hian sapthei ching tur chu chhungkaw 20 ve ve an thlan thu te, chhung khatah Rs. 1,22,000/- chuang deuha pek an nih thu a sawi bawk.