Mizoram Governor in BCM hruaitute a kawm

Mizoram Governor Hari Babu Kambhampati chuan Mizoram mipui tam zawkin Central Sawrkar Scheme atanga hamthatna an neih theihna tura a hmalakna chhunzawmin hemi chungchang hi nimin khan Mizoram Baptist Kohhran hruaitute chu a sawipui.

Raj Bhavan-a he sawihona ah hian Governor chuan Baptist Church of Mizoram (BCM) in mipui vantlang rawngbawlna huangah hna tha tak a thawh thin thu leh a thawk mek zel tih a hriat thu sawiin, Zirna leh tihdam rawngbawlna huanga an hnathawh te chhuanawm a tih thu te a sawi a. Baptist Kohhran hruaitute chu an kohhran mite kaihruaia rawng an bawlna ah leh vantlang rawngbawla an fehchhuahna hmun a piangah mipui hamthatna tura sawrkar Scheme tha tak tak te sawi tel thin turin a ngen a ni.

Governor chuan Mizoram hmun hrang hrang a tlawh hnu leh tlawmngai pawl hruaitute a kawm hnuah Mizoram mipui tam zawkin Central atanga Social Security Scheme tha tak tak te an hriat loh avangin an dawng lo tih a hmuhchhuah thu a sawi a. Hei hi thinlung taka a vei thu sawiin, vawi tam tak Bank te, Sawrkar Department hotute leh Tlawmngai pawl hruaitute a kawmna ah pawh a sawi thin thu a sawi a. Mizoram mipui tam thei ang berin Central Sawrkar atanga hamthatna an dawn chu an chanvo a ni a; tunah zirtirna tha tawk rihlo mahse hriattir ngei chu an chanvo a ni, a ti a. Mizoramah Kohhran chu mipuite rawngbawltu pawimawh ber pakhat a nih thu leh mipuiin Kohhran hruaitute thu an ngaichang a, Kohhran hruaitute thusawi chu zawm a hlawh a. Hei vang hian mipui ten thil tha an dawn theihna turin Kohhran hruaitute chu an hun leh hmun remchang neihna ah te thahnem ngai taka Welfare Scheme leh Social Security Scheme te mipui zirtir turin a ngen tih a sawi a ni.

Governor nena an inkawmnaah hian BCM Hruaitute chuan Mizoram mipui te hamthatna tura thahnem ngai tak Governor kan nei chu lawmawm an tih thu an sawi a. Governor sawi ang hian heng Scheme tha tak tak te hi an hriat ngai loh deuh vek a ni tih an sawi a. Governor thahnem ngaihna leh Mizoram mipuite a duhsakna chu an hriatthiampui tih sawiin, hun remchang apiang mipui zirtirna pawh kalpui tha an tih thu an sawi bawk a ni.

Nimin a inkawmna ah hian BCM hi an President Rev. Dr. Zolawma hovin an tel a, BCM hian Lunglei-ah Hqrs. neiin Kohhran rawngbawlna chu Zirna ah leh tihdam rawngbawlna huang thlenga an kalpui thu an sawi a. Mizoram chhung leh pawnah College atanga pawl hniam ber zirna thlengin zirna In 100 chuang an enkawl mek thu te leh Sawrkar Damdawi In te a tam tawk loh avangin Hospital pahnih leh Nursing College te an theih ang tawka tha in an kalpui tih an sawi bawk.