Manipur-a Mizoram Police chesual-ah mi 1 thi

Manipur State Assembly inthlan-a Duty Mizoram Armed Police te chuanna motor chu nimin zing dar 1:30 vel khan chesualin mi pakhat a thi a, midang 10 in hliam an tuar.

He vanduaina thleng chungchang hi nimin-a Assembly Budget Session-ah Home Minister Lalchamliana chuan sawi chhuakin Mizoram Police Headquarters leh Mizoram Sawrkar chu a tul apiang ti turin a inring reng tih a sawi a. Home Minister sawi danin, Ministry of Home Affairs thupek angin Mizoram Armed Police Force Company 10 chu Manipur inthlanpui-a duty tur hian tirh an ni a, tluang taka an Duty-na hmun hi thlengin February ni 28 khan Bishnupur District-a inthlan thawh khatnaa an Duty hnuah inthlan thawh hnihnaa Duty turin Tamenglong District-ah tirh chhunzawm an ni a. Tamenglong District-a an thlenna tur hmun Tamenglong College chu lirthei lian chi a luh theih loh avangin Pik-up hmangin an inthiar a, a kal tawpna berah Pik-up chu a brake lam chiang lo vangin nimin zing dar 1:30 khan a chesual ta a ni.

He chetsualnaa hian 2nd IR Battalion Constable K. Lalawmpuia Champhai khua chu a boral a, midang 11 - SI RC. Muana, Hav. Lalbiakmawia, Hav. VL Dingliana, Hav. R. Lalbiaknunga, Constable Lalhlimpuia, Constable Lalmawizuala, Constable Lalbiaknunga, Constable R. Lalnunmawia, Naik Lalsawmliana leh Hav. Lalsangzuala te an hliam a, hliamte hi Tamenglong District Hospital-ah dah luh nghal an ni a, he chetsualnaa boral Constable K. Lalawmpuia hi District Hosipital thlenpui a nih chuan a lo boral tawh a ni. Mitthi ruang hi District Hosipital-ah endik theih a nih loh avangin Imphal-a ti tura ruahman a ni a, hliamte pawh Imphal damdawi in lama refer an nih angin Helicopter hmanga lak an ni a, K. Lalawmpuia ruang hi Thlawhtheihna hmanga lo phur haw tura buaipui a ni.