Mipui ten Bairabi Rel Station an hmang tangkai

Mizoram in Rel hmanga inkalpawhna a neih chhun, Bairabi Rel Station chu mipuiin an hmang tangkai hle a, zin veivak mai bakah bungraw phurhna atan hman thin a ni.

Bairabi North VCP R. Lalfakawma chuan Rel hmanga zin passenger an tam thu hi sawiin, “Bairabi atanga Silchar kal man hi Rs. 25 chauh a ni a, darkar 3 kal anih bawk avangin leh ticket hi lak zung zung theih anih avangin mipui ten an chhawr tangkai hle a ni,” a ti a. Rel chuan zing dar 4:30 ah Bairabi chhuahsanin tlai dar 4:30 ah a lo let leh thin nia sawiin, Silchar-a bazar tur hian Aizawl leh Mizoram khaw dang atangin Rel chuang tura an kal thin thu a sawi.

Bairabi SDC Office thawktute chuan State dang atanga lokal zin mite pawhin Rel chu an chhawr tangkai hle nia sawiin, “Ticket a harsat loh avang leh a tlawm avangin khualzin lo lut pawh an thahnem hle a. Thla khatah hian ILP hi 2000 atanga 2500 vel kan pechhuak tlangpui a. Motor ah Rs. 350 vel hman ngaihna ah Rs. 25 vel lek sen a ngai a, hei hi khualzin te hian an bawh nasat phah niin kan hria a ni,” an ti bawk.

Bairabi Rel Station-ah hian khualzin phur Rel bakah bungraw phur Rel te an lut thin a. Bungraw phur Rel hian buhfai an phur deuh ber a, buhfai bakah hian Mizoram-a Rel kawng siam mek hmanrua te chu an phurh ber a ni. Buhfai phur Rel wagon a lo thlen tum chuan buhfai phur tur Truck 200 vel load an pe thin a, englai pawhin Truck 100 vel chu an ding reng thin a ni.