Hri leng karah Chapchar Kut-2022 Aizawl-ah Chief Minister hova hman a ni
Chapchar Kut-2022 chu COVID-19 hri leng avangin kumdang anga hman theih ni lo mah se nimin khan Aizawl-a Vanapa Hall-ah sawmbik mi tlemte ten an hmang a, he hun hi Chief Minister Zoramthanga chuan Kut Pa nia hmanpuiin he hun hman hi mipui ten zau zawka an chhim theih nan TV lamah en theih tura phochhuah a ni.
Kumin-a Chapchar Kut-ah hian 'Zonun zemawi - Rinawmna' tih chu thupui atan hman niin Kut Pa Chief Minister Zoramthanga chuan kumin a Chapchar Kut thupui chu a pawimawh thu a sawi a, Thiam thil hrang hrang nei, khawvel thleng pawh a langsar pha pawh ni mah ila, rinawmna kan neihloh chuan kan theihna leh thiamna te chawkchhetu a lo nih zawk theih avangin rinawmna kan nun a vawn theuh a pawimawh thu a sawi. Chief Minister chuan Mizoram in tunhnaiah hun khirh tak a paltlang mek tih pawh sawiin, Hripui leng, ramri buai, kangmei nasa tak, Vawk hri leng, thenawm ram inrelbawlna buai avanga mahni sahimna zawnga rawn lut khawm tam tak nen, Economy harsatna nen kan awm dan a sawi a. Harsatna namen lo tawkte hi an dingchhuakin, hlawhtlinna leh ropuina an chang thin tih history atangin hmuh tur a awm thu sawiin, keini pawh harsatna hrang hrangin min tlakbuak avangin kumdanga kan tih thin angin Kût kan lawm theihloh phah a. Amaherawhchu heng harsatna te hi mi entawntlaka mi hruailuttu ni turin tangkaia kan hman thiam a pawimawh thu a sawi bawk.
He hunah hian Central YMA President R. Lalngheta chuan inlawmna thu sawiin Kut Thlengtu leh Art & Culture Minister R. Lalzir-liana chuan hri leng, hun khirh tak kan la paltlang loh avanga a huho a hman theih a la nilo chu pawi a tih thu sawiin, Hlim taka zavaia la hman theih leh hun a herchhuah thuai a beisei thu a sawi a. Mahni hnam a chian a, chawisan nachang hriat a pawimawh thu pawh sawiin, Hnamdang tih dan, an culture leh tawng te kan ngaihsan hma in keimahni hnam a kan chian a, kan ngaihsan hmasak a pawimawh thu a sawi bawk.
Nimin-a Aizawl Vanapa Hall-a Chap-char Kut hmanna hi hun hnih ah then a ni a, Mizo Hnam Lam chi hrang hrang leh Rimawi tum bakah Lemchan te entir a ni a, Zaithiam hrang hrangte an zai bawk a ni.