Vairengte - Sairang 4 Lane laih turah kawng kalna tur tihfel ala ni lo - Chief Minister

Chief Minister Zoramthanga'n Vairengte leh Sairang inkar kawngpui 4 Lane-a laih turah zangnadawmna tihfel a la nih loh chhan chu kawng kal dan turah inhnialna a la awm rih vang a ni tih Assembly Session neih mekah a sawi.

Ningani-a Assembly inkhawm ah Vairengte leh Sairang inkar kawngpui laih tur leh zangnadawmna chungchanga zawhna Revenue Minister in a chhanna chu sawifiah belhin Chief Minister sawi danin Vairengte leh Sairang inkar 4 lane-a laih turah hian fel chiahlo lai ala awm tih a sawi a, a bikin Tlawngkam Mualkhang rama kawng kal dan turah Mizoram Sawrkar leh NHIDCL lam ngaihdan a inang lo a, Mizoram PWD chuan kawng hi tuna a awmsa chhak lam, Mualkhang ram lama kal tir an duh a, NHIDCL lam chuan tuna kawng pangngai, Tlawng lui kamah siam an tum thung a. Tuna kawng awmsa te takte pawh leimin leh thil dang vanga enkawl a hautak avangin a chhak lam Mualkhang rama kal tir turin an nawr a, chuti ni lova kawng awmsa zulzuia siam a nih chuan fur-ah harsatna tam tak a thlen theih dawn avangin an ruahmanna chu thlak tura ngen a ni.

Zoramthanga chuan, kawng lai dan turah hian NHIDCL lam pawhin ngaihdan phir neiin tuna kawng kalna leh Mualkhang ram lama kal tura duh an awm tih a sawi a, an inrawnkhawm hnuah tuna kawng awmsa Tlawnglui kam-a siam turin ruahmanna an siam a, Union Road Transport and Highway Minister, Nitin Gadkari pawhin an tum dan hi Phone hmangin a rawn hriattir tih a sawi a. Hei hi nasa takin a dodal tih sawiin Chief Minister chuan, Mizorama NHIDCL hotu awmte hnenah pawh an ruahmanna chu a that loh thu an hrilh thu a sawi a. Fur laia harsatna thleng thei leh leimin chungchang bakah Mualkhang Gas Bottling Plant lamin Four Lane-a kawng laih a nih chuan buaina an tawk thei dawn a, Rel kawng a hnaih lutuk bawk avangin an ruahmanna chu sut a, a chhak lama lai zawk turin an innawr mek a, a hmun hrechiang chuan lui kama Four Lane laih chu tha an ti lo, an laih chuan kawng awmchhunah traffic a ti buai vek dawn a. A chhak zawka laih a nih chuan kawng pahnih a awm thei dawn a, pakhat zawk zawk a lo chhe palh a nih pawhin a helna tur a awm thei dawn avangin tangkai taka hman a ni thei dawn tiin an innawr mek a, NHIDCL pawh an hmin thei dawn viauin an hria tih a sawi a ni. Kawngpui laihna tur lai takah hian an innawr lai mek a nih avangin Compensation ti tur pawhin a la chiang thei lo tih Chief Minister chuan a sawi bawk.