Kawng survey nawn leh ngaih thin chhan sawifiah

PWD changtu Chief Minister Zoramthanga chuan kawng sialna tur Fund a liam hlauh avanga hnawhsarum-a kawng zawn anih in Work Order inpek tawh hnuah kawng laihna turah rem lo lai a lo awmin Survey neih that a ngai leh thin tih House a hrilh.

Nimin-a Assembly inkhawm zawhna leh chhanna hunah MNF Member K. Laldawngliana zawhna kal zela zawhbelhna ah ZPM Legislature Party Leader Lalduhoma chuan Meidum leh Hortoki inkar kawng laihzauh tura hnathawk tura thlan te Work Order pek an nih tawh hnua Survey neih leh a ngaih chhan kalhmang PWD Minister hi a zawt a. Zawhna hi chhangin Chief Minister chuan Work Order pekchhuah tawh hnua hnathawh dawna kawng inzawn tir leh awm thin chu a dik tawk lo tih chu thu dik tak a ni tih sawiin, a tir atangin uluk takin kawng Survey ti danglam lo turin an ti tur a ni tih pawh dan pangngai anih thu a sawi a. Hetia Survey neih a ngaih leh thin chhan sawi-fiahin, kawng sialna tur Fund a liam mai dawn tawh avangin hmanhmawh deuhin kawng zawn a ngai thin a, Google atang te in kawng an han zawng a, a taka laih dawn chuan rem lo lai, enfel ngai lai, Contractor in zawn tir ngai deuh lai a awm thin tih a sawi a. Entirna a sawilan zingah Serchhip Sailiamkawn leh Keitum inkar pawh tarlangin, NHIDCL nen pawh an inhnial thu leh tuna kawng kalna ni lo, Ralkiau-a kham hnuaiah kal thei tho tur a nih laiin Compensation an lo pek hman vek tawh avangin tih theih a nih loh thu a sawi bawk.

Congress Legislature Party Leader Zodintluanga'n PMGSY hnuaia Thuampui leh Lungchem inkar kawng laitu Contractor pakhat hnathawk tha duh lo awm chu ‘Sawrkar angin action emaw, vauna emaw min pek sak thei ang em?’ tih a zawhna chu chhangin Chief Minister Zoramthanga chuan, hna an thawh that loh na na na chuan a tul angin heng hi Engineer ten lo enin hna thawk tha turin hma an lo lak tur thu a sawi bawk.