Hrileng avanga State in harsatna a tawh chu a kiam ta viau - Health Minister

Zonuna Kawlni (LENKAWL) • March 12, 2022 • Comments • Mizoram

Health Minister Dr. R. Lalthangliana chuan hrileng avanga State in harsatna a tawh chu a kiam ta viau tih a sawi.

Secretariat Conference Hall, Aizawl-a Mizorama COVID-19 dinhmun thlirhona leh hmalak zel dan tur sawihona nimin-a neih ah he thu hi sawiin Dr. R. Lalthangliana chuan ramchhung State dangte nena khaikhinin positive zat la tam viau mahse hmun danga an tih tawh loh Test Mizoram in a la kalpui hnem hle a, khaw thenkhatah phei chuan a khaw mite duhthusam ang takin Mass Testing te pawh kalpui a la ni tih a sawi a. Positive zat tam deuh mah se nunna chan erawh State dangte khaikhinin an tlem hle tih sawiin, Mobile RT-PCR chu a tul huna hman mai theih turin Lengpui-ah dah a nih thu leh ICMR kaltlanga UNICEF atanga Mizoram State-in a dawn RT-PCR pariat (8) pawh ICMR lamin an rawn thawnchhuak tawh a, hun reilote ah lo thleng mai tura beisei a ni, a ti.

Health Minister chuan ZMC-a enkawl ngai an tlahniam tih sawiin, hrilen vanglaia awl hman lo khawpa damlo ngah thin khan tun dinhmunah admit ngai an tlem tak thu leh OPD pawh hawn thuai tum a ni tih a sawi a. Chutiangin, District tina DCHC, CCC leh 4C-a admit ngai an tlem hle a, hrileng avanga State in harsatna a tawh chu a kiam ta viau tih a sawi a ni.

He thutkhawm ah hian Kohhran inkhawm chungchang leh Kohhran inrelbawlna chungchang ah MKHC ten an duh dan an sawi chu Dr. R.Lalthangliana chuan ngai pawimawhin Chief Minister leh State Executive Committee (SEC)-ah te thlen nise an ti a. Zirlaite Off-line a Class kal chungchang pawh SEC ah thlen ni se an ti bawk.

Mizoram chhunga District hrang hrangah hrikai enkawlna DCHC 20 a awm mek a, DCHC-a damlo enkawl theih zat atanga chhutin 18% chauh hri kai enkawl mek an awm a, CCC-a awm thei zat atanga 5% luahkhah niin 4C khum 14,045 awm theihnaah damlo 683 chauh awmin hei hi 4.8% a ni. Mahni in lama inenkawl home isolation-a awm mek hi mi 2678 an awm a, chu chu active case awm zat atanga chhutin 75% a ni. March ni 10, 2022 thleng khan Mizoram-ah COVID-19 Vaccine dose 14,89,659 pekchhuah a nih tawh thu he hunah hian tarlan a ni bawk.