AIS-a tlin theih an MZP in zirlai an sponsor dawn

Mizo Zirlai Pawl (MZP) chuan Mizote Central Services leh All India Service-ah kan tlin theih nan mi pathum (3) sponsor turin hma an la mek tih an sawi.

Nimin a Aizawl-a an Office-a a thuthar thehdarhtute an kawmna ah MZP General Hqrs. hruaitute chuan MZP chu zirlai pawl a nih angin zirlaite chawikan chu an ngaih pawimawh ber pakhat a ni tih sawiin, Mizoram hian All India Service leh Central Service a tling hi tunhnaiah a neih tak mang loh thu leh All India Service-ah phei chuan kum 10 dawn Mizo thalai tling thar a awm tawh lo tih an sawi a. Mizote Central Services leh All India Service-ah kan tlin theih nan hma an lo lak tawhna te pawh tarlangin, heng te hian awmzia a neih mawh hle tih an sawi a ni.

MZP General Hqrs. hruaitute chuan tunah hian hmalakna chi dang kalpui an rilruk thu sawiin, Mizo zirlai thluak tha leh theihna nei, tumna tak tak nei zawnchhuaha, India khawpui New Delhi-a Coaching tha bera kal tir (sponsor) turin hma an lak mek thu an sawi a. “Tunah hian Vajiram & Ravi Coaching Centre N. Delhi chuan MZP tan Seat 5 lai min reserve sak tawh a. Nimahsela, sum leh pai a hautak dawn avangin MZP chuan mi pathum sponsor turin hma kan la mek a ni,” tiin heng mi te hi an senso engkim an tum sak dawn thu leh kum hnih chhung kalpui phawt tura ruahman a ni tih an sawi bawk.

Sponsor tur thlan kawngah hian UPSC Exam kalphung zulzuiin Screening Test kalpui a nih dawn thu leh Personal Interview uluk taka neih hnuah a titha pathumte thlan an ni ang tih MZP hruaitute chuan an sawi a, Mizo zirlai tu pawh, Graduate tawh te tan www.mzpmizoram.com leh www.exploremizoram.com-ah dilna form download tur an dah thu leh March 26, 2022 thleng hawn a nih tur thu an sawi bawk.