PWD in Airport-a hnathawh lai chim sawifiahin a tlawhtu ten thil thleng chhui an phut thu an sawi
Lengpui Airport cheithat hna thawh meka Slab chhun chu niminpiah tlai khan a chim a, Mizoram PWD chuan tha taka siamtha leh tura hmalak nghal a ni tih sawiin, ZPM leh Congress Legislature Party te chuan nimin khan helai hmun hi tlawhin he thil thleng hi chhui leh a mawhphurtute laka hremna pek an phut thu an sawi a ni.
Lengpui Airport cheithat hna thawh mek ‘Improvement/Upgradation of Operational/Non-Operational Facilities of Lengpui Airport under NESIDS’ hnuaia bungrua buaipuina hmun Baggage Makeup Area (BMA) sak mek chu niminpiah tlai khan chimin he vanduaina thlen lai hian helai hmuna hnathawktute chu an bang tawh a, hnathawktu mi tlem azawng la awmin an zinga pakhat chuan hliam tuarin Aizawl Civil Hopsital panpui a ni. He hnathawh chim chungchangah hian nimin khan Mizoram Public Works Department chuan thuchhuah siam nghalin March 10, 2022 tlai dar 4:50 khan Lengpui Airport Terminal Building sira Baggage Make-up area sak mek chu a chim hlauh mai tih an tarlang a, “Baggage Make-Up area hi a vaiin 520.02sq.m a ni a. Heta tang hian 238.50sq.m hi slab chhun zawh tawh a ni a. A bang 281.50 sq.m hi chhun lai mekin a chim ta a ni,” an ti. He Slab chhunlai chim chhan ber ni a lang pawh tarlangin, “Lei atanga slab san zawng hi 6.00mtrs lai a sang a ni a, chu chu form work/shuttering chhawng thum-a mau leh thing hmanga do a ni a, slab chhun lai a tihmuk nana vibrator an hmanlaiin a dona mau thenkhat hi a pelh palh a, chu chuan a slab chhunlai 281.50sq.m hi a tlakpui ta a ni,” an ti a. Nimin zing dar 8:30 khan a hmunah Contractor leh Engineer ten an enho nghal thu leh tha taka siamtha leh tur a hmalak nghal niin Contract Agreement ang ngeiin Contractor hi sum sen belh awm lova siam tha leh tura hriattir nghal a ni tih an tarlang a. Hetianga beisei loh taka thil alo thleng ta mai chu pawi an ti takzet tih an tarlang bawk.
He hnathawh chimna hmun hi nimin khan ZPM Legislature Party Secretary Dr. Vanlalthlana MLA leh Party hruaitu thenkhat te chuan a hmun ah tlawhin he chhiatna, hnathawktu hliam tuar awm leh hmasawnna sum tam tak engmah lo a chang ta mai chu pawi an tih thu an sawi a. “He chhiatna thlenga mawhphurtu hi zawng chhuak a, dan anga hremna pe ngei turin Mizoram Sawrkar kan phut a ni,” an ti.
He hunah hian Dr. Vanlalthlana chuan, “Assembly Session neih zawh taka zawhna chhanna-ah khan Airport-ah hian Vbc. 47 chuang restricted tender-in pek a ni tawh. Hetiang zat zet sum sen a ni chunga a chim thei hi kan ngaih a tha lo,” tiin “Thil fel lo a awm a nih chuan a tawp thlengin kan umzui dawn a ni,” a ti bawk. ZPM Party chuan he hna thawktu hi KR Construction an nih thu pawh sawiin, Sept. 20, 2021-a Work Order pek a nih laiin April 21, 2021 khan hna tan a lo nih tawh thu an sawi bawk.
Congress Legislature Party te pawhin an Leader Zondintluanga hovin helai hmun hi nimin vek khan an tlawh a, “Mizoram hmasawnna atana Project lian tak hi an thawh tan kan hriat tirh atangin Mizoram mipuiten kan dem nasa hle a. Pawisa pawh a awm hma, Work Order pawh pek a nih hmain an duhsak zawng an thawh tir mawlh mawlh a. A hmun ah ngei kan han en a, an hnathawh a chhe em em a, cement pawh awm mang lovin a inchar tha lo em em bawk,” tiin Chief Minister-in a duhsak em avanga huangtau taka siam a nih vanga chhia a nih thu CLP Leader chuan a sawi bawk.
He building chim hi a Slab chiah chim anga sawi a nih laiin CLP Team-in a endikna atangin a ban te pawh a tliak tih MPCC in thuchhuah an siam ah an tarlang a, “Hna a chhe em em a, a sakna hmanrua cement, balu leh rora a in chawhpawlh tha lo hle,” tiin “Hetianga hna chhe lutuka thawh a nih avanga chhiatna thleng hi dan anga chhui ngei nise, mawhphurtu te lakah hremna lek kawh ngei ni rawh se,” tih chu an ngaihdan a nih thu an sawi bawk.