LENKAWL ADS (Computer zir duh tan 6) :

Nimin-a International Women's Day pual hian Mizoram-a Political Party thenkhat te chuan hun hmangin hmeichhe thenkhat te hnenah chawimawina an hlan a ni.

BJP Mizoram Pradesh State Mahila Morcha chuan Aizawl-a an Party Office-ah Hmeichhie te ni pual hian hun hmangin he hunah hian an Party President Vanlalhmuaka chuan BJP chuan an Party an ni emaw anni lo emaw ngaihtuah lovin, Hmeichhia ten harsatna an tawk anih chuan an tan an ding reng tih a sawi. He hunah hian kum 2006 atanga Bag thui-a eizawng Hmarthangvungi (Zuangtui Veng) te, kum 2008-a Edenthar Veng-a Hnamchhantu ten Handicraft training an buatsaih atanga eizawnna atana hmang Vanlalchhanhimi (Edenthar Veng) leh Puanthui leh Puantah hmanga eizawnna hlawhtling tak nei Vanlalchhanhimi (Armed Veng) te hnenah chawimawina an hlan a ni.

International Womens' Day pual hian Congress Mahila Headquarters chuan MPCC President Chamber-ah hun hmangin he hun hi an President Vanlalawmpuii Chawngthu chuan a kaihruai a, he hun hi an Party President Lalsawta chuan hmanpuiin mipa leh hmeichhe inkar zau awm thei tih bo zel a ngai tih a sawi a, “Mipa tam tak hian hmeichhiate tawrhna ang tuar tur ni ila khawvel mihring hi kan chimit hial tawh a rinawm. Hmeichhiate chuan hrehawmna leh harsatna tam tak an pawmin an tuar tlang thei a ni,”a ti bawk.

ZPM Zonu General Hqrs. pawhin International Women Day pual hian Aizawl Press Club-ah hun an hmang bawk a, he hun hi ZPM Leader Lalduhoma chuan a hmanpui a, Dr. Hmingthanzuali, Assistant Professor, Department of History & Ethnography, Mizoram University leh Dr. Lalbiakdiki, Professor, Department of Education, Mizoram University & Director, College of Development Council te chuan thu an sawi a, he ni hi hmeichhe te tan chuan ni pawimawh tak a nih thu leh an dikna chanvo te, hmeichhia an nih anga an zalenna te an hriatchian lehzual a ngaih thu te an sawi a ni.