April 2022 hmain SEDP Teacher lak a ni dawn

School Education Minister Lalchhandama Ralte chuan, Academic Session thar, April 2022 hmain zirtirtu indaihlohna sutkianna turin SEDP Teacher lak a ni dawn tih a sawi.

Assembly Session neih meka a Demand sawihona a khaikhawmna a thu sawi ah Minister chuan Muster Roll (MR), CSS leh SEDP atanga hma an lakna avangin sawrkar school ah enrollment a pung tih sawiin, hun hmasa ah chuan school khar leh sawikhawmte a lo awm tawh thin thu leh tunah chuan chutiang ang chu a awm meuh tawh loh thu a sawi a. April, 2022-a Academic Session tan hma in zirtirtu indaihlohna phuhrukna tur SEDP Teacher lak an nih dawn thu sawiin, a theih chin chinah a khaw mi ngei lak an tum thu a sawi bawk. 

Covid hrileng vangin Private School ten harsatna an tawh nasat thu leh kum 2020-ah Fee 50% leh 2021-ah 70% an laktir tih sawiin, Academic session thar atang chuan 100% an lak tawh tur thu a sawi a, a pangngai (100%) a fee an lak loh chuan Private School te an damkhaw-chhuak zo dawn lo niin Minister chuan a sawi a, 2022-23 Academic Session atangin naupang Mit chaklo te tan Text Book Large print (hawrawp lian) an siam dawn thu leh pawl 6-8 a zir turin Mizo thil leh zia hriat theihna tur 'ZO NUN'  tih telh a nih dawn thu te sawiin, “Mizoram Education Policy angin, Maths leh Science te hi Mizo tawng a zir theih turin dah vek a ni dawn,” a ti. Education Minister chuan Exam System siam danglamin Scheme of Education an duang tih a tarlang bawk a, “Question an siam atanga 40% chu zirlaiten anmahni irawm atanga an chhan theih tur bilh tel a ni dawn,” tiin, quality education ah hmasawnna a thlen an beisei thu a sawi bawk.