Jet Fighter hmanga Aizawl beih champha-ah I&PR Minister hovin 'Zoram Ni' hman a ni

March ni 5, 1966-a Jet Fighter hmanga India Sawrkarin Aizawl a bomb hriatreng nana Mizo Zirlai Pawl (MZP) ten kum 2008 atanga he ni puala ‘Zoram Ni’ an hman thin chu kumin ah pawh Inrinni khan hman leh niin he hun hi I&PR Minister Lalruatkima chuan a hmanpui a ni.

Hyve City Hall, Aizawl-a ‘Zoram Ni’ puala hun hman ah hian I&PR Minister Lalruatkima chuan MZP-in kum 2008 atanga chawl lova Zoram Ni an hmang chu lawmawm a tih thu sawiin, “March ni 5, 1966 khan Zoram khawvela kan hun tawn lungchhiat thlak ber mai kan tawng a. Aizawl leh Mizoram hmun hrang hrang Indo thlawhtheihna hmanga Bomb a ni,” a ti a. “Zoramin zalenna famkim a neih theihna atana British hunlai atanga beitu, Martar leh pasalthate Zoram Ni-ah hian zahna chibai ka buk a, Zofate thinlungah in nung reng dawn a ni,” a ti. Minister chuan, “Zoram Ni kan hmanna chhan chu Zoram mipuiten Zalenna kan duh a, chumi avanga hmalak duhna thinlung atanga irh chhuak a ni,” tiin India Sawrkarin a ram chhung ngeiah Jet Fighter hmanga a beih hial ngai awmchhun kan ni chu a lungchhiatthlak a tih thu a sawi a. “Hnamdang te hi kan zah tur a ni a, hlauh erawh kan hlau tur a ni lo,” tiin Mizote chu hnam huaisen, tlawmngai, rinawm leh taima tia miten min hriat reng a pawimawh thu a sawi bawk.

Minister chuan Zoram Ni hi Mizote harh tharna ni leh Mizote thinlungah Mizona (Nationalism) tuh thar lehna ni nise a duh thu sawiin, Mizoram lo hi ram kan nei lova, Mizo hnam kan nihna angin, kan hnam tan theihtawp chhuah tur leh lungrual taka hmalam pan tur te, State dang te tluk loh leh entawn kan nih theihna atana ngaih-tuahna thar seng turin Mizo mipuite a sawm a ni.

Kumin a Zoram Ni puala hun hman hi MZP General Hqrs. Vice President Andrew F. Lalramnghaka chuan kaihruaiin MZP President Lalnunmawia Pautu bakah F.Vanlalrochana te pawhin thu an sawi a. March ni 5, 1966-a Jet Fighter hmanga India Sawrkarin Aizawl a bomb hriatreng nan kum 2008 atangin he ni hi hman a ni.