Chanchin thar lawrkhawm :

Zonuna Kawlni (LENKAWL) • March 2, 2022 • Comments • Mizoram

PMGSY hna thlirhona nei

Nimin khan Khawzawl-ah District Bawrh-sap CC. Lalchhuangkima hovin Khawzawl District chhunga Pradhan Mantri Gram Sadak Yojana (PMGSY) kaltlanga kawng laih hna thawh mek te dinhmun thlirho a ni a, a bikin PMGSY hnuaia Khawzawl-Ngaizawl kawng laih mekah tunhnaia dan leh thupek kenkawh kawnga harsatna (Law and Order Issue) thleng chungchang sawiho niin, a thlen nawn tawh loh nana hmalak tulte ngaih-tuahho a ni a. Chak zawka hnathawh a nih theih nan tanrual a tul thu pawh tarlan niin District Bawrhsap kaihhruaina hnuaiah Sawrkar Official leh Sub-Hqrs. YMA ten remchang hmasa berah a hmunah kala tlawh nise an ti bawk.

Sawrkar in thiah tum

Chalfilh Tourist Destination chu National Green Tribunal thupek (Judgement Order) kumin January 19-a chhuakin thiat tura min tih angin thiah tum a ni tih Tourism minister Robert Romawia Royte chuan a sawi a. Hetih rual hian NGT Judgement Order hi Supreme Court-ah appeal tura hmalak mek a nih thu Assembly Session neih mekah Vanlalhlana, MLA zawhna chhangin a tarlang bawk. Tourism Minister chuan, Chalfilh Tourist Destination-ah hian building leh structure hmun 8 a awm tih sawiin, Infrastructure sakna property zawng zawng hlut zawng chu cheng nuai 759 hu a ni, a ti.

MADC Draft Roll tarchhuak

Mara Autonomous District Council (MA-DC) inthlanna neih tur atana inbuatsaihna kal mekah he inthlanna neih tur atana hman tur Electoral Roll ennawn hna thawh tan niin nimin khan Draft Electoral Roll chu tarchhuah a ni a, MADC hnuaiah hian MDC constituency 25 awmin, Polling Station 81 a awm a, kumin January 1-a kum 18 tling chin te lain Elecotal Roll ennawn hna hi thawh a ni dawn a ni.Tunah hian MADC huam-chhungah hian Vote nei mi 43,014 awm mekin tih tur hrang hrang te tihfel a nih hnuah tun thla ni 28 khian Final Electoral Roll tarchhuah a ni ang.

Lawngtlai DC in CMO hnenah Ambulance a hlan

Lawngtlai Bawrhsap Dr. Andrew H. Vanlaldika hmalaknaa National Scheduled Tribes Finance and Development Corporation (NSTFDC) atanga Lawngtlai District-a COVID-19 hri leng dopuina leh hriselna kawnga mamawh phuhrukna tura Ambulance dil chhuah chu nimin khan Lawngtlai DC chuan tangkai taka hman atan Lawngtlai Chief Medical Officer Dr. LP. Malsawma kutah a hlan.

Cyber Jagrookta Diwas

Sawrkar laipui-a Ministry of Home Affairs thupek angin Cyber Jagrookta (Awareness) Diwas neih tur niin tun March thla ah chuan Vawiin tlai dar 4:00 - 5:00 inkar hian Primary School (Class I - V) zirtirtute tan Cyber Awareness and Hygiene chungchangah 'Train the Trainer programme' chu Internet kaltlanga buatsaih tum a ni a. He prog-ramme chhim tur hian Mizoram chhunga Primary School tin atang zirtirtu pakhat tal tel tura beisei niin, Mizoram Police, School Education Department leh I&PR Department tangkawpin an huai-hawt dawn a, I&PR Department YouTube link, https://tinyurl.com/mzdipr-ah he live programme hi a duh apiang tan chhim theih a ni ang.