Chanchin thar lawrkhawm :
National Science Day hmang
National Science Day-2022 lawmna chu nimin khan Mizoram Science, Technology & Innovation Council, Directorate of Science & Technology leh Planning Department, Govt. of Mizoram buatsaihin Innovation Facility Centre Exhibition Hall, Aizawl-ah neih a ni a, ‘Integrated Approach in Science & Technology for Sustainable Future’ tih chu thupui-ah hman a ni. He Ni puala hun hman hi Chief Scientific Officer H. Lalsawmliana chuan kaihruaiin Mizoram hmun hrang hranga he ni hman dan leh kum danga hman tawh dan te tarlan a nih bakah he ni puala thupui hmanga thusawi ngaihthlak a ni a, State Level Science Quiz 2022 (Online) MISTIC-in a buatsaih result puanna leh lawmman semna hun hman a ni nghal a ni bawk.
Ruahmanna hran siam lo
Horticulture Department changtu Chief Minister Zoramthanga chuan tun dinhmun ah Hnahlan leh Champhai leh hmun hrang hranga Grape chingtute tan ruahmanna a hranpa a siam a awm lo tih nimin-a Assembly inkhawm ah VL. Zaithanzama zawhna chhangin a sawi a. Hei bakah hian Chief Minister chuan Zodintluanga Ralte zawhna chhangin Mizoram-ah Oil Palm nasa zawka ching tura hmalakna a awm lo tih pawh sawiin, kum 2005 atanga kalpui dan kha a pangngaia la kalpui reng a ni tih a sawi a. Sawrkar laipui lam atangin Mizoram-ah Oil Palm ching tura nawrluihna a awm hran loh thu leh Mizoram sawrkar in sawrkar laipui lamah Oil Palm nasa lehzuala ching tura tanpuina a dil loh thu a sawi bawk.
Home Ministry-ah dil mek
Home Minister Lalchamliana chuan nikum a Lunglei leh a chhehvel ram kang Thlawhtheihna hmanga thelhna man cheng vbc. 3.25 chuang chu tanpuina anga kal tir turin Ministry of Home Affairs-ah dil mek a ni tih nimin khan House-ah a sawi a, kangthelhtu Pilot leh anmahni puitute ei leh in leh riahna senso cheng nuai 3 vel chu rulh vek a ni tawh thung tih a sawi bawk.
Total Bandh neih tum thulh
Hmar Peoples Convention (HPC) Party-in SHC sawrkar paihthlak dodalna atana Vawiin atanga tiamchin awm lova Sakawrdaia Total Bandh huaihawt an tum chu Sakawrdai VC-in thulh tura ziaka an ngen avangin thulh rih an remti a. SHC chungchanga MNF leh HPC inremna ang taka kal erawh an phut tih an sawi bawk.
ZPM CM candidate Duhoma
ZPM Party chuan hripui leng avanga hun rei tak an khaihlak hnuah nimin khan Chhung Inkhawm nei leh tanin he huna thu sawitu ZPM President Lalliansawta chuan, “Pu Duhoma hi kan CM candidate a ni tih kan puang chiang a, hman atangin kan ram hmasawnna a vei em em a, ani hi Zoram beisei ber leh mipuiin an thlir ber a ni,” a ti a. An party chhungkaw boruak a nuamin an hlim em em tih pawh sawiin, “Miten min beihna boruak leng vel hi chu a awm reng ang; mak tak tak pawh kan la tawng ang. Heng harsatna lo thleng thei te hmachhawn turin kan rilru i tuai-thar sauh sauh zel ang u,” a ti bawk.
Union Minister in Aizawl-a BJP Office a tlawh
Mizoram tlawha rawn kal Union Minister of State for Health & Family Welfare Dr. Bharati Pravin Pawar chuan nimin khan Aizawl a BJP Office tlawhin Party mipuite nen inkawmna an nei a, Dr. Bharati Pravin Pawar-i chuan Central Sawrkarin Mizoram District tinah Dam-dawi In siam leh a awmsa tihchangtlun anih tur thu te, Education-ah Central in hnamhnufualte tanpui tumin a bik takin Mamit District phei chu a hmun ngeia a hmuh avangin puih an ngaih zia a takin a hmu tih a sawi a. Central chuan kawng tinrenga Mizoram chawikan tumin hma a la tih a sawi bawk.
ZPM bansan chhan sawi
ZPM Southern Hqrs. Lunglei-a hruaitu ni thin, tunhnaia MNF Party zawm ta V. Kapchungnunga leh Duhawma Rokhum te chuan nimin khan Aizawl Press Club-ah thuthar thehdarhtute kawmin ZPM Party chu Party dang MNF, Congress, BJP te nen danglamna a awm lo leh Party dang ten an duh ang chu an duh ve zel avangin leh ram leh hnam damna tak tak tura hmalakna a awmloh avang bakah chhan hrang hrang te avangin ZPM Party hi awmzelna tlak ah ngai lovin an bansan ta tih an sawi.