Budget-ah hmasawnna tur a lang lo - ZPM

ZPM Party chuan Mizoram Budget-ah hmasawnna tur a lang lo niin an sawi.

Nimin-a thuchhuah an siamah ZPM Party chuan kum 2022-23 atana Mizoram sawrkarin sum hman dan tur chu Assembly Session vawi 8-na chuan a pawm ta tih tarlangin, “Kan sawrkar hrawn mek hian Budget vawi thum a pharhna ah a Flagship Program-in hawilam a nei lo tih a chiang hle,” an ti a. Hmasawnna ruhrel dinna tur hawi zawnga ruahmanna ah mipui vantlang tana hmasawnna leh nawmsakna hawi zawnga sum hman dan turin kumtin hniam lam a pan zel nia tarlangin, “Chutiang bawkin ei leh bara hmasawnna tur lam (economic sector) hmalakna tur sawi viau mah se an sawrkar tirha sum hman pumpui 31% lai ni kha kumin ah chuan 24% ah a tlahniam tawh a ni,” an ti a. “Hmasawnna tura hmalak a tumna ber Flagship Program SEDP hi a takah chuan sum hman danah a lang chiang a. Hniam lam a pan zel avangin kum 2022-23 budget-ah hian mipui tan beisei tur a awm lo hi a lungchhiat thlak kan ti hle a ni,” an ti bawk.

ZPM Party chuan rorelna sang berah hawihhawmna leh dawhtheihna tlakchham zia, House decorum kenkawh kawngah Speaker-in hna a tlin loh zia a lang chiang hle nia tarlangin, “Kan CM bakah Ruling MLA thenkhatten Dan lo a thil kal leh siamthat ngai Opposition MLA-ten an sawichhuah chu ‘Kalphung pangngai’ ah an pawm thu leh CM-in ‘Kum 60 chuang kan kal tawh dan hi kan thlak dawn lo’ a tih phei chu mipuiten roreltu kan thlak a hun tawh zia a tilang chiang hleah kan ngai a ni,” an ti a. “He sawrkar hian insiamthat tumna emaw, sum hman danah hmasawnna hawi zawnga ngaihtuahna an sen loh zia a tilang chiang hle bawk,” an ti a ni.