Vice President in pawl hrang hrang hruaitute a kawm

Mizoram tlawha rawn zin mek Vice President M. Venkaiah Naidu chuan nimin khan Raj Bhavan-ah Mizoram University(MZU) hotute, NGO Coordination Committee hruaitute, Mizoram Kohhran Hruaitute Committee aiawh, Ex-Mizo National Army (Ex-MNA) hruaitute, Zo Reunification Organisation(ZORO) hruaitute leh Ukraine buaina rawn chhuahsana Mizoram rawn thleng ta hmeichhe pakhat te chu a kawm a. Governor Hari Babu Kambhampati pawh he inkawmnaah hian telin Vice President hnenah pawl hruaitute ngenna te a lo thlenpui a ni.

Vice President hian Mizoram-ah Kohhran te leh tlawmngai pawl hrang hrang ten sawrkar tha taka an thawhpui thin tih a hriat thu sawiin, heng pawl tangkai tak tak hnathawh pawimawh tak tak te leh Mizoram hmasawnna atana an hlawhtlinna ah te lawmthu a sawi a. Sawrkar tha taka thawhpui chhunzawm zel tur te, remna leh muanna a awm theihna atan theihtawp chhuah zel tur leh India ram inpumkhatna atan pawl tangkai tak ni zel turin a chah a ni.

MZU hotute chuan MZU hmasawnna te leh mamawh te Vice President hnenah hian an thlen a. Lunglei khawpui-a MZU Southern Campus chu a taka kalpui a nih thuai theihna tur leh hmalak nana thil tihfel hmasak ngai te chinfel thuai a nih theih nan hma lak sak turin an ngen a. Mizoram thalaite Sports ah theihna sang tak an neih thu sawiin, Mizoram-a College of Physical Education din turin rawtna an thehlut a. Mizoram-ah Damdawi In inenkawlna tha a awm tlem avangin AIIMS ang tluka tha Multi-Speciality Hospital din turin rawtna an thlen a. Champhai leh Mamit-ah te College tha bik, Star College din turin rawtna an thehlut bawk.

Kohhran leh Tlawmngai pawl hruaitute chuan Vice President hnenah hian Myanmar Refugee Mizoram-ah 30,000 chuang an rawn lut tawh tih sawiin, an dinhmun a khawngaih thlak zia leh tanpui an ngaih zia te, India sawrkar chu Democracy lian ber a nih anga raltlante chunga ngilneih chhuah tur leh tanpuina pe turin an ngen bakah a lo mikhualtu khua leh District te sum leh paia chhawmdawl an ngai tih an sawi a ni. Hei bakah hian Mizo Tawng chu 8th Schedule of the Constitution-ah telh an rawt a; Mizoram tan IAS Cadre hran neih a tul thu te pawh sawiin, Bru Refugee te Tripura a awm hlen tura inremna siam fel a nih tawh angin an Vote te Mizoram atanga paih thuai a tul thu te pawh an sawi bawk a ni. Assam leh Mizoram ramri chungchang te pawh sawi a ni a; inremna tluantling a awm theih nana Central Sawrkar chu hma la tura an beisei thu te sawi a ni a. Border Trade a taka kalpui a nih theih na tura central sawrkar chu hma la tur leh Assam Rifles te Aizawl khawpui laili atanga sawn chhuak tura ngenna te pawh siam a ni bawk.