MZP in Zirlaite tawrhna hriatrengna ni hmang

Mizo Zirlai Pawl (MZP) chuan nimin khan March 10, 2018-a Zophai, Bairabi hmuna zirlaite tawrhna hriatrengna hun a hmang.

Nimin a Aizawl-a MZP Pisa Pui-a he hun hman hi an President Lalnunmawia Pautu chuan kaihruaiin he huna kalkhawmte chuan Zophai-a Mizo zirlaite tawrhna khan India sawrkar laipui a au eih nia sawiin, “Mizo zirlaite thisen chhuak chuan Mizoram leh Assam in ramri buai a neih zia India sawrkar laipui a hriattir bakah, a hmunah ngei an rawn ngaihven phah a. Zoram mipuite pawhin ramri buai kan neih zia kan hriatphah bakah, ramri kan ngaihven phah a ni,” an ti a. Kan ramri a him loh zia pawh chiang takin mipui hriatah a tarlang chiang hle tih pawh sawiin, Mizoram ramri buai hi chinfel a nih thuai theih nan Mizoram sawrkarin chak lehzualin hmala chhunzawm zel se MZP chuan a duh takzet tih an sawi a. Zophai-a Mizo Zirlaite tawrhna kha MZP chuan a hre reng tih sawiin, Ram leh hnam tana tuartu zawng zawngte zahna chibai an buk tih an sawi bawk.