AYUSH Hospital 6 sakna tur lungphum phumna neiin Health & Wellness Centre Unit 24 hawn a ni
Mizoram-a AYUSH Hospital 6, Khum 50 awm theihna pathum (3) leh khum 10 awmna pathum (3) sakna tur lungphumna leh Mizoram-a AYUSH Health & Wellness Centre Unit 24 hawnna chu nimin khan neih niin Chief Minister Zoramthanga leh Ministry of AYUSH changtu Minister Sarbananda Sonowal te chuan an hmanpui a ni.
Dawrpui Multipurpose Hall, Aizawl-a hemi puala hun buatsaih ah Chief Minister Zoramthanga chuan AYUSH Ministry kaltlanga Mizoram-ah Healthcare lama hmasawnna ruhrel din belh a ni tur chu lawmawm a tih thu sawiin, AYUSH inenkawlna chu India sawrkarin a ngaihpawimawh thu a sawi a, a enkawl turin India hmarchhak mi ngei sawrkar laipuiin a dah chu lawmawm a tih thu a sawi. Chief Minister chuan AYUSH inenkawlna atana damdawi hman thin - ramhmul damdawi hrang hrang chinna tur hmun zau leh tha tak Mizoram in a neih thu te pawh sawi bawkin, hemi kawngah hian India hmarchhak chu potential nei tha tak a nih thu te a sawi bawk.
He hunah hian khual zahawm Union Minister Sarbananda Sonowal chuan hmarchhak State te chu India ram tana tangkai, potential a neih hrang hrangte chu haichhuah a hman tangkai chuan India ram chakna chhan ni thei tih a sawi a, sawrkar laipui pawhin hmarchhak State-te tih hmasawn chu a ngaihpawimawh thu sawiin, India ram a intodelh tura hmalakna ‘Atmanirbhar Bharat’ kalpui mekah Mizoram pawh intodelh turin theihna potential tha tak tak a neih avangin a vanneih thu a sawi a. Lungphum phum tak project-te pawh a hun taka zawh ngei a beisei thu a sawi bawk.
Nimin-a lungphum phum tak 50 Bedded AYUSH Hospital pathum hi Aizawl, Champhai leh Hnahthial a sak tur niin, 10 Bedded AYUSH Hospital pathum hi Khawzawl, Saitual leh Hortoki a din tur a ni a. Health & Wellness Centre Unit 24 hawnna te hi Ramhlun South, S. Maubuang, Sakawrdai, Armed Veng North, Khatla, Venghnuai, Baktawng, Sesawng, Sakawr-tuichhun, Keifang, Bungkawn, Ngopa, Khuang-thing, Lawngtlai, Parva, Chawngte, Pukpui, Tuichawng, New Serchhip, Keitum, Chapui, Niawhtlang, N. Thingdawl leh Darzo Sub-Centre ah te a ni.
Nimin a he hun hman hi Health Minister Dr. R. Lalthangliana chuan kaihruaiin nimin a hawn tak Health & Wellness Centre Unit 24 bakah hian sawrkar kum tharah Unit 12 hawn belh tum a nih thu leh Ramhmul damdawi chinna tur ram hectare 11,310 a zau a awm thu bakah Nursery 8 leh Model Nursery 2 a awm thu a sawi bawk.