Kum 7 chhungin Beng tha lo 17,895 hmu tawh

Kum 7 kalta chhungin Mizoram-a damlo en mi 1,46,746 zingah Ri hriatna tha lo 17,895 hmuhchhuah a ni.

Tun thla ni 3-a ‘World Hearing Day’ puala H&FW Department thuchhuah ah he thu hi tarlan niin Ri hriatna tha lo zingah hian Beng dar vuah tura kawhhmuh mi 6,914 an awm a, Beng zai mi 1,789 leh Beng natna hmuhchhuah 64,112 an awm bawk. National Programme for Prevention and Control of Deafness (NPPCD) State Consultant, Dr. Lalthanmawii Khalthang chuan NPPCD hi April 2014 atang khan Mizoram-ah hman tan niin NPPCD in a tum ber chu Bengngawnna thlen theitu natna leh intihpalhna lak atanga inveng tura mipui zirtirna pek te, Beng natna a hma thei ang bera hmuhchhuaha enkawl dam vat te, Beng enna khawl hrang hrang changtlung taka neih leh beng lama mithiamte training pek leh Bengngawng ten an tawh fo endawng leh hmuhsitna tihbo te a ni, a ti a. District hrang hrangah Beng lama mithiam – ENT Doctor/Trained Medical Officer, Audiologist, Audiometric Assistant leh Hearing Instructor te dah an nih thu a sawi bawk.