LENKAWL ADS (Computer zir duh tan 6) :

ZPM Party chuan MNF sawrkar in mipui sum (budget) a suasam tak tak dawn a nih chuan ngawi renga an thlirliam loh tur thu an sawi.

Nimin a thuchhuah an siamah ZPM General Hqrs. chuan Chief Minister Zoramthanga chuan MNF sawrkar Flagship Programme, Socia Economic Development Programme (SEDP) chu kumin 2022 atangin sem a nih tur thu January 28, 2022 khan Kolasib-ah a puang tih tarlangin, kum 2023-a MLA inthlan hunah mipuiin MNF party an vote duh phahna turin SEDP pawisa dawngtu tur pawh thlang turin MNF Unit a ruat nghal thu leh Congress leh ZPM chhungkuate thlang lo turin ualau takin a hrilh bawk niin an tarlang a. Mipui sum, budget-a dah, vote zawn nana sem a nih tur thu leh, a dawngtu thlang tura Party Unit a ruat thu Chief Minister meuhin vantlang hriata a puang ta mai chu ram Dan bawh-chhiatna, Dan palzutna dik tak a ni tih sawiin, “Mizoram politics history-ah a la tenawm ber hialah ZPM chuan a ngai a, MNF sawrkar hian heti mai maia mipui sum (budget) a suasam tak tak dawn a nih chuan ZPM chuan ngawi rengin a thlir liam hauh lo ang,” an ti a ni.

ZPM thuchhuah chuan kum 2018 inthlanpuia MNF party auhla kha, NLUP dawng tawh nen lam chhungkaw tin hnenah cheng nuai 3 aia tlem lo sem a ni tih phat theih lohin MNF Party President Zoramthanga sawi lai, video hmuh theihin a la awm reng tih pawh sawiin, “MLA inthlan hma kum atangin vote zawn nan an tinzawn a ni tih chiang em em in, NLUP dawng tawh zawng zawng chu sawi loh, party chhungah pawh mi tlemte te hnenah mipui sum (budget) chu sem an tumna kawngah a dawng tur thlan leh buaipuitu (agency) atana party Unit an hman tur thu ualau taka Chief Minister meuhin a puang hi Mizoram mipui hmuhsitnaah ZPM chuan a ngai a ni,” an ti a. “Kan sawrkar hrawn mek hi mipui sawrkar ni lovin, party sawrkar a nihzia a rawn inpuang chiang taah ZPM chuan a ngai a ni,” an ti bawk.