Ni khat-a hri kai hmuh tam ber ni thleng leh ta

Mizoram-ah COVID-19 hri kai hmuhchhuah an la pung zel a, niminpiah khan Sample 8137 enfiah niin heng atang hian hri kai 2531 zet hmuh leh an ni a, Sample enfiah atanga za zela 31.10 te chuan hri an kai a, Mizoram-ah nikhat-a hri kai hmuhchhuah an tam ber ni a ni.

Niminpiah khan ZMC leh Lunglei-a RT-PCR Laboratory-ah Sample 1660 enfiah niin heng atang hian hri kai mi 556 hmuh an ni a, an zinga 505 te hi ZMC atanga hri kai hmuh niin Lunglei-a RT-PCR Laboratory atangin hri kai mi 51 hmuh an ni bawk. Fluorescent Immunoassay Test hmangin Aizawl-ah Sample 62 enfiah niin hri kai mi 4 hmuh an ni bawk a, an vaiin Aizawl khawpui chhung ami an ni.

District 7-a TrueNat Laboratory-ah Sample 150 enfiah niin hri kai mi 48 hmuh an ni a, an zinga 14 te chu Champhai District ami te niin Kolasib District-ah 12, Mamit District-ah 11, Aizawl District-ah 9 leh Lunglei leh Serchhip District-ah hri kai mi pakhat ve ve hmuh an ni.

Rapid Antigen Test hmangin niminpiah khan Sample 6118 enfiah niin heng atang hian hri kai mi 1923 hmuh an ni bawk a, an zinga 1238 te chu Aizawl District-a hri kai hmuhchhuah an ni a, Veng leh khaw mal a hri kai mi 10 leh aia tam hmuhna 48 zet an awm a ni. Heng bakah hian Lunglei District-ah hri kai mi 172 hmuh niin Kolasib District-ah 124, Serchhip District-ah 103, Saitual District-ah 93, Mamit District-ah 85, Champhai District-ah 82, Hnahthial District-ah 15 leh Siaha District-ah hri kai mi 11 hmuh an ni bawk.

Heti hian nimin thleng khan Mizoram-a hri kai hmuhchhuah chu 1,75,022 ni tawhin nimin khan hri kai 2318 te enkawl dam niin hri kai enkawl dam zawng zawng chu 1,61,642 niin hri kai zinga za zela 92.36 te chu enkawl dam an ni tawh a, hri kai enkawllai 12,768 an la awm a. Nimin khan hri zinga boral mi pathum chhinchhiah belh leh niin nimin thleng khan hri kai mi 612 an boral tawh a ni.