Union Budget-ah Mizoram-a hnathawhna tur ruahman

Zonuna Kawlni (LENKAWL) • February 2, 2022 • Comments • Mizoram

Parliament Budget Session-ah nimin khan sawrkar kum thar atana Union Budget pharh niin Mizoram tan hnathawhna tur sum pawh ruahman a ni.

Union Finance Minister Nirmala Sitharaman-i chuan nimin khan Parliament-ah Union Budget hi pharhin Budget pharh takah hian India hmarchhak State te hmasawnna tur atana Scheme thar a pharh - Prime Minister New Development Initiative for North East Scheme hnuaiah chuan India hmarchhak state hrang hrang tan cheng vbc. 1500 dah a ni a. Heng project hrang hrang zingah hian Mizoram tan project pahnih - cheng vbc. 600 hu chu a tel a ni. Heng project te hi Construction of Aizawl By-pass on western side (cheng vbc. 500) leh Pilot Project for Construction of Bamboo Link Road at different locations in various Districts in the State of Mizoram (cheng vbc. 100) te an ni.

Chief Minister Zoramthanga chuan nikum November thla khan Delhi-ah heng project-te hi a hlawhtlin theih nan sawrkar laipui hruaitu leh thawktu pawimawhte bia in hma a lo la tawh a. PM-DevINE hi North Eastern Council (NEC) kaltlanga kalpui tur a ni.