ZMC-a Genome Sequencing tihna khawl hmang theilo

COVID-19 hri kaite hri kai eng chi ber nge tih hriat theihna atana Zoram Medical College (ZMC)-a Genome Sequencing tihna khawl chu tun thlengin hman tangkai theih a la ni lo.

ZMC hotute hnen atanga thudawn danin Genome Sequencing tihna khawl hi nikum October ni 27 khan Health Minister Dr R. Lalthangliana’n ZMC-ah a hawng a. Enchhinna (trial run) vawi engemaw zat an neih hnu-ah a tir atangin a khawl hi a chiang thei lova. A khawl rawn buntute ko chho tura vawi tam tak an beih hnuah pawh harsatna an neih avangin tun thlengin an lo chho thei rih lo niin an sawi a. Mizoram-a hri leng mek hi eng chi (variant) nge tam ber tihte endik a tul an tih thu leh ti thei lova an awm chu hrehawm an tih thu an sawi bawk.

Hetihlai hian Mizoram-a hri kai hmuh tawh zinga thenkhat, eng Variant nge tih hre tura National Insitute of Bio-medical Genome (NIBMG), Kolkata-a endik tura sample 319 thawn thlak result chu nimin thlengin hriat theih a la ni lova. Hetianga result hriat tlai a nih chhan hi an endikna Laboratory a thawk engemaw zatin hri an kai vang niin an sawi. Endikna result hi hriat theih la ni lo mah se, Coronavirus zinga inkaichhawn awlsam ber ni a mithiamte’n an sawi ‘Omicron variant’ chu Mizoram-ah a darh ve tawha an rin thu an sawi a. Tunhnaia Covid-19 vanga nunna chan tam ber hi Aizawl khaw pawn an nih avangin thihpui tam ber Delta variant hian Mizoram thingtlang lam a la chamchilh ni a ngaih a nih bawk thu an sawi a ni.