ACB in Skywalk leh Ropeway an la chhui zo lo

Sakawrhmuituai tlang-a Skywalk leh Chaltlang-Durtlang inkara Ropeway siam chungchang thubuai chu a chhuitu (Preliminary Inquiry) Anti-Corruption Bureau (ACB) lamin an chhuina report Lokayukta-ah an la thehluh loh vangin thubuai kal zel dan tur hriat theih a la ni lo.

Lokayukta Chairman C. Lalsawta IAS (Rtd) chuan ACB in thubuai an chhui hun chhung tur chu ni 45 tih ni mah se, chhan hrang hrang vangin thubuai chhui chhung a rei thin a, Skywalk leh Ropeway thubuai chhui mekah pawh State pawn lam company hming a lan bawk vangin chhui hun chhung a rei phah thei bawk niin a sawi. C. Lalsawta chuan skywalk leh ropeway chungchang ACB-in an chhuina report a hmuh hunah Regular FIR ziahluh tur nge tihah thutlukna siam tur a la nih thu sawiin, tun dinhmunah chuan ACB lamin an chhuina report an la zawh loh vangin reguer FIR tur a nih leh nih loh engmah hriat theih a la ni lo tih a sawi bawk.

Skywalk leh Ropeway chungchangah hian MNF Party-a Vigilance Department leh Legal Board te chuan November 22, 2021 khan Lokayukta ah complaint an lo thehlut tawh a, complaint an dawn chu thutlingah ngaiin, thubuai an ziak lut a, an zirchian hnuah December thla bullam khan preliminary inquiry chu ACB kutah a dah a ni.