Chanchin thar lawrkhawm :

Inkaihhruaina hman zui tur

Mizoram Chief Secretary Renu Sharma chuan nimin khan thupek tichhuakin State Executive Committee Chairman a nihna anga January 7, 2022-a COVID-19 inkaihhruaina a chhuah chu thu leh awm hma atana hman turin a pawtsei tih a tarlang a. Hemi ang hian tuna hri leng laka in-kaihhruaina hman mek, nizan zanlai-a tawp tur chu hman chhunzawm a ni dawn ta a ni. Nimin vek khan Chief Secretary chuan thuchhuah dang siamin January 21-a ‘COVID-19 No Tolerance Week’ inkaihhruaina tihchhuah chu chawlhkar hnih (2), February 1, 2022 atanga February 14, 2022 zanlai dar 12:00 thleng Mizoram pumah hman tura pawhsei a nih thu a tarlang bawk.

MJA President in hmanpui

MJA Mamit District Annual Conference vawi 14-na leh MJA Golden Jubilee lungphun hawnna chu nimin khan Mamit Press Club-ah neih a ni a, he hun hi MJA General Hqrs. President Zonunsanga Khiangte chuan khuallian nia hmanpuiin Journalist-ah sum leh pai-a tuihal huam huam te chu an awm rei peih thinlo tih a sawi a. Journalist Pension chungchang pawh sawiin, “Hruitu ten theihtawp chhuahin sawrkarah thlen thin chu a hmawr kan bawk thei tep tawh a, Pension thei tur chuan kum 30 service leh kum 60 tling te pek tur a ruahman a ni a, Golden Jubilee ah pension hmasa ber pek hman kan beisei rualin file thui tak paltlang ala ngai a ni,” a ti bawk.

Minister hovin rawtna siam

Pathianni-a Health Minister Dr. R. Lalthang-liana hova sawrkar mi pawimawh te SAD Conference Hall-a thukhawm chuan hri leng avanga Red Zone-a puan huamchhungah zing tawngtai inkhawm tih loh chu Kohhran inkhawm leh Sakhaw lam thil ni lova inkhawm phal loh ni se tiin rawtna an siam a, Zinga ke-a kal leh thirsakawr hmanga insawizawi phalin, mi panga aia tam a huhova insawizawi erawh chu khap nise tiin Gym pawh hawn phal loh nise an ti a, sawrkar Pisa-ah in-hnaih lova hnathawh dan ruahman an rel bawk.

A hun taka hlawh pek phut

Congress Thalai, Mizoram Pradesh Youth Congress Committee (MPYCC) chuan January 28, 2022 khan Kolasib khuaah MNF Diamond Jubilee lawmna leh Hnam Run hawnna inkhawm ah MNF President leh Chief Minister ni bawk Zoramthanga chuan SEDP pawisa chu Mizoram-ah chhungkaw 50,000 - 60,000 hnenah sem an tum thu a sawi tih thuchhuah siama tarlangin, hetianga pawisa an sem thei a nih chuan Mizoram ei leh bar innghahna lian bera ngaih; Sawrkar hnathawkte hlawh hi a hun takah pe turin an phut tih an tarlang a. “Sawrkar hnathawkte hlawh pek mumal loh hian sawrkar hnathawkte chauh ni lo, Mizoram mipui mimir hian nasa takin kan tuar vek a ni,” an ti bawk.

Kumdang aiin vawt nasa lo

Tunhnaia Thlasik khawvawt chu na hle anga sawi awm mah se Science and Technology lam hotute chuan an tehna khawlin chuti taka khawvawt anga a chhiar loh thu an sawi a. Tunhnaia Media thenkhat a khaw vawh dan tarlan chungchang ah an khawl pawh chik taka an endik thu leh khaw vawh dan hi a degree hniam lutuk lo mahse boruaka hnawng awm dan leh thil thawt dan a zirin a takah chuan a aia vawtin mihringin an hre thei niin an sawi a. Tunhma a Mizorama khaw vawh dan aia vawt chuang lutuk a, an hriat loh thu an sawi a. Tunkar chho hian ruah pawh sur tura hrilhlawk a nih thu pawh an sawi bawk.