Finance Commission sum hman dan zirhona nei

Nimin khan Lunglei-ah ni 4 chhung awh tur 15th Finance Commission atanga sum hmuh hman dan leh hnathawh vil zui dan tur zirhona neih a ni.

Lunglei LAD Conference Hall-a ‘Training on 15th Finance Commisssion Grants & Prevention and Control of Fire For Village Councils, Lunglei/Hnahthial District’ ah hian Lunglei DLAO Carolyn LB. Khiangte chuan 15th Finance Commission sum hi eng atan nge kan hmuh tih leh engtia hman tur nge tih VC ten an hriatchian a pawimawh hle tih a sawi a, “Sum kan hmanna kawngah a hmanna tur dik takah hmangin langtlang takin kan hnathawh dan mipuiten an hriat a pawimawh,” a ti bawk a. VC thenkhat ah sum hman dan leh hnathawh dan inhrilh hre tha duhlo awm thin angin report dawn a awm thin thu pawh sawiin, hetiang lakah hian VC tinte an fihlim a pawimawh thu leh, mipuite lakah pawh langtlang takin thil tih tum tur a nih thu a sawi bawk.

Kangmei chhuak tur ven kawngah VC ten mawhphurhna sang tak an nei tih inhre thar leh tura VC kalkhawmte chu chahin DLAO chuan, thuneihna an neih dan leh ram tikang lo tura hmalak dan turte pawh hriatchian a pawimawh thu a sawi a. District Level Fire Prevention Committee in February ni 7 atanga ni 12 chhhunga Fire Prevention Week a hman turah pawh District Level Committee ruahmanna te tha taka bawhzui turin VC kalkhawm te hi a sawm a. Village Council tin ten an ram chhunga huan leh lo ram vat zawng zawng ten March ni 15, 2022 ralhma ngeia hal vek turin a chah bawk a ni.