Sumdawnna himlo ah fimkhur turin mipuite chah

Serchhip Police te chuan sumdawnna himlo, Pearlvine International laka fimkhur turin mipui te an chah.

Hemi chungchanga Serchhip Addl. SP in thuchhuah siama a tarlan danin tunlai hian Pearlvine International inti ten Membership Fee Rs. 2250 chawia, an sumdawnna-a member ni turin Serchhip leh khaw thenkhatah mi an zawng mek tih hriat a nih thu leh Crypto-currency hmanga sum peipunna hlawk tak anga inchhalin downline member thar tur an zawng thin tih hriat a ni tih an tarlang a ni.

Addl. SP thuchhuah chuan he sumdawnna hi a himlo hle tih tarlangin, Serchhip Police ten an sumdawn dan kalphung an chhuina atangin tunhma Chiahpuam an kalpui dan (Ponzi/Pyramid Scheme) nen a in ang hle tih a tarlang a. “An sumdawnnaah hian thil hralh leh zawrh awm lovin downline member zawn hmuha point hmuh theihna hlawk tak a ni a. Hetiang sumdawnna Sum lu (capital) ina hna thawk silo a hlawkna awm thei chi hi a himlo hle a ni,” tiin Chiahpuam kan tih te nen khan a kalphung a inan thu leh Criminal Case te pawh siam theih a nih avangin mipuite chu fimkhur turin an chah a ni.