Serchhip IOC Veng-a rawng zawrhna dawr neitute Serchhip District Commission in sum chawi turin a ti
Serchhip IOC Veng-a V&Sons dawr neitu ten an dawr atanga rawng an hralh leituin a hawnna lama rawng puakin a hawngtu mit lehlam a tihchhiat chungchangah Serchhip District Commission (Consumers Court) thuremna chu nimin khan tihchhuah niin rawng zawrhna dawr neitute hi Rs. 4,30,000/- chawi tura tih an ni.
Thudawn danin nikum Nov 5 khan Consumers Court tia hriat thin, Serchhip District Commission-ah H. Lalremruati, New Serchhip Venglai chuan Consumer complaint a thehlut a, he complaint-a a lan danin H. Lalhmingthanga (70) chuan V&Sons, IOC Veng atanga an rawng bur lei, Berger 200ml chu a hawnna lamah rawng chu rawn puakin a Mit lehlam a phuh a, a Mit hian khua a hmu lova, hemi avang hian Consumer Court-ah thubuai hi thehlutin Berger Paint Agent V&Sons te chu Court kaltlangin an inenkawlna senso cheng nuai 3 leh zangnadawmna cheng nuai 2, a vaiin cheng nuai 5 chawi turin a phut a. He thubuai hi Commission chuan thu tlinga ngaiin Consumer Court case 11 of 2021 a ziahluh a ni.
He thubuai chungchang ngaihtuahna kal zelah Video Conferencing kaltlangin Court Hearing hi neih thin a ni a, thubuai thehluttu leh dawr neitute chu insawifiahna hun pek an nih bakah Doctor te thurawn leh inenkawlna chungchang te ngaihchan a hun pek anih hnuah H. Lalhmingthanga Mit chu zai in awmzia a awm loh tur thu leh a del hlen a rinawm thu Doctor te atanga hriat anih hnuah a lehlam ve ve te hi sawi tur an neih te sawina hun pek an ni leh a. Hemi hnu nimin, February 1, 2022 khan Court chuan thutlukna a siam ta a ni.
Serchhip District Commission thutlukna ang chuan V&Sons, IOC Veng Serchhip te hian vanduaina tawktu H. Lalhmingthanga te hnenah hetiang hian Damdawi inenkawlna senso atan Rs. 50,000/- leh Serchhip leh Aizawl inkar zinna senso atan Rs 10,000/- an pe anga, H. Lalhming-thanga Mit del avanga a sum lakluh tur hloh chhawmdawlna atan Rs. 2,50,000/-, Rilru hah leh tawrh man Rs. 20,000/-, a Mit del tak avanga a nun hlimna leh a damchhung hun tha a hloh avanga zangnadawmna atan Rs 1,00,000/-; a vaiin Rs. 4,30,000/- pe turin a ti a ni.
Pawisa chawi turte hian an sum chawi tur hi Court thutlukna tihchhuah ni atanga chhiara ni 60 chhungin an pe tur a ni, an pe lo anih chuan an sum chawi tur hi kum khata 12% in a pung ang.