Chanchin thar lawrkhawm :
Task Group din thar leh a ni
COVID-19 hripui leng hmachhawnna kawng ah mipuiten ei leh in tur chatlak lova an hmuh theihna tura hmala turte, VLTF/LLTF leh pawl pawimawh dangte nen awmze nei taka Vegetable Supply Chain kalpui dan tur ruahmante leh Mizo-ram pawn atanga Essential commodities lakluh dan tur ruahman leh vil bakah khairual taka Mizo-ram chhung hmun hrang hranga sem rual dan turte ruahman turin Task Group on Civil Supplies and Essential Commodities chu din thar a ni a, Chairman-ah FCS&CA Department Secretary Zothanmawia leh Member Secretary-ah FCS&CA Director Ramdinliani te ruat an ni.
Champhai-ah School kal dawn
Champhai District Bawrhsap in thupek a tihchhuah thar angin Champhai District-a zirna In te chu naktuk atang hian hawngin Offline in School kal tan a ni dawn a, Covid Symptoms nei te chu Special Leave pek tur an ni ang.
PC Thalai ten sut leh phut
PC Party Thalaite chuan Mizoram sawrkar a a nghet loa thawk, Provisional Employee te sawr-kara an ngheh ve theihna Scheme Mizoram sawrkar in a tihtawp sak ngawt chu hriatthiam harsa an tih thu leh a rang thei anga sut tura Mizoram sawrkar an phut thu thuchhuah siamin an tarlang a. Austerity measure hmanga mi 8,500 te hamthatna tihtawp sak an nih hnuah pawh Sawrkarin a nghetin mi 498 a la leh tho si te, regular staff te hamthatna kal reng tho si te chuan MNF sawrkar inrelbawlna mumal loh zia in innghahna tlak sawrkar tha a ni lo tih a tarlang ah an ngaih thu an sawi bawk.
Lo hal atanga kang a tam
Nimin khan Aizawl-ah District Level Fire Prevention Committee chu an Chairman leh Aizawl DC Dr. Lalhriatzuali Ralte hovin an thukhawm a, he huna tarlan a nih danin nikum chhung khan Aizawl District-ah Forest area ah kangmei vawi 10 chhuakin Forest area pawnlamah vawi 266 a chhuak a. Aizawl chheh-velah kangmei lian tham tum- Sakawrhmuituai, Reiek tlang, Muthi khaw hnuai, Zokhawsang leh hmun dangah a chhuah thu tarlan niin heng kangmei te hi Lo hal atanga chhuak an ni deuh zel tih tarlan a ni bawk.
Khawzawl District-a raltlan dinhmun thlirho
Nimin khan Khawzawl-ah District Level Committee on Myanmar Refugees chu an Chairman leh DC CC. Lalchhuangkima hovin an thu-khawm a, he hunah hian Khawzawl District chhunga Myanmar ratlan awm mekte dinhmun thlirho niin tun dinhmunah District chhunga khaw 5 - Khawzawl, Chhawrtui, Chawngtlai, Tualpui leh Tlangmawi-ah te raltlan 54 awm mekin, heng raltlante hi an chhungte bel leh mahnia intung-nung theiin an awm vek a, a hranpaa Refugee Camp buatsaih a awm lo tih tarlan a ni a. State sawrkar atangin Myanmar raltlante puala tanpuina Rs. 39,719/- dawn tawh a nih thu leh heng te hi semchhuah vek tawh a nih thu tarlan a ni bawk.
MYC Chairman in a bial-a raltlan te a tlawh
Lunglei North Bialtu MLA leh Mizoram Youth Commission (MYC) Chairman Dr. Vanlaltanpuia chuan Myanmar atanga Mizoram-a raltlan a bial chhunga dahna hmun pathum chu nimin khan a enfiah. Lunglei North Bial chhungah hian raltlante hi Haulawng-ah hmun hnihah dah an nih bakah Zotuitlang-ah te dah niin, an vai hian mi 95 an awm mek a, heng hmun a tlawhna ah hian Dr. Vanlaltanpuia chuan raltlan te chu kan unau te vek an ni tih sawiin, “Ram in ri nei mahse; Hnam in ri a neih loh avangin lo lungngai suh u,” a ti a, “ Chief Minister Pu Zoramthanga kaihhruai sawrkar hian a ngaihthah dawn reng reng lo che u a ni,” tiin an mamawh hrang hrangte pawh a hlan nghal a ni.