Lawngtlai District-ah raltlan 5300 lut tawh

Lawngtlai District-ah Myanamr atanga raltlan rawn lut mi 5300 zet chhinchhiah a ni tawh.

Nimin khan Lawngtlai-ah District Level Committee on Myanmar Refugees chu a tum hnihna atan an Chairman leh Lawngtlai District Bawrhsap Andrew H. Vanlaldika hova thukhawmin he thu hi tarlan a ni a, Lawngtlai District-a raltlan lut tawh 5300 zinga 3,522 chu kum 18 chunglam niin, hmeichhia 1,739 leh mipa 1,783 an ni a, kum 18 hnuailam mi 1,778 an awm bawk. Heng raltlan te khawsakna, an ei leh in tur leh damdawi bakah an mamawh hrang hrangte a tul dana ngaihtuahsak an ni bawk.

Lawngtlai District-a raltlan lo thleng tharte hi COVID-19 hri an kai leh kai loh endik hmasak zel niin, raltlan zingah hri kai mi 298 hmuh chhuah tawh niin, thihpui mi pakhat a awm a, mi 14-in hri an vei mek a ni. COVID-19 hri danna pawh a la theite chu pek ve zel niin, dose khat la tawh mi 1,553 leh dose hnih la kim tawh mi 336 an awm a. Raltlante chetvel dan uluk taka vil zui a nih theih nan an mimal chanchin nen uluk taka chhinchhiah hna kalpui mek niin, raltlante hi ID Card pe vek tura ruahman a ni a, tunah hian ID Card 98 siam tawh a ni.