Khua leh tui nih theihna kawnga tangkai thei document pek kawngah fimkhur turin in chah

Nimin khan Lunglei Sub-Hqrs. YMA Conference Hall-ah raltlan chungchanga inhmuh-khawm neih a ni a, khua leh tui nih theihna kawng atana tangkai thei tur Document pekchhuah kawngah fimkhur a tul thu tarlan a ni.

He inhmuhkhawmna ah hian Political Party hrang hrang aiawh bakah Kohhran hrang hrang aiawh te telin he hun kaihruaitu Lunglei Sub-Hqrs. YMA President Lalrotluanga chuan raltlan tanpuina kawnga pawl leh Kohhran leh mimal hrang hrangte hmalakna lawmawm a tih thu sawiin, kan lo dawnsawn danah erawh fimkhur a tul thu leh nakinah keimahni kan la indem palh te a hlauhawm avangin fimkhur tlan a tha tih a sawi a, hetihlai hian mihring an nihna angin eitur leh an mamawh an nghei tur a nilo a, nakin zela kei-mahni min hlap let thei kawngah erawh fimkhur a ngai hle a ni, a ti.

He hunah hian sawihona zau tak neiin Kohhran hrang hrang aiawhte chuan raltlan, an Kohhran beltute chu tha taka an dawnsawn thu leh member nghet nihna erawh pek an tum mailo tih an sawi tlangpui a, hetihlai hian Nau hlan leh Baptisma chantir erawh mi in an duh chuan an thlarau nun ngaihtuahin Kohhran tan chuan tihloh ngawt chu thil remchang lo nia an hriat thu an sawi a. Kalkhawmte hian nakin hun lokal zel atana thil pawimawh thei, khua leh tui nih theihna kawng atana tangkai thei tur Document pekchhuah kawngah Kohhran te fimkhur tul an tih thu an sawi a. Political Party lam te pawhin thahnem ngaih vanga khua leh tui ni tur leh vote nei thei tur zawnga hmalak loh tha an tih thu sawiho a ni a, hemi kawngah hian mahni Kohhran theuhah leh Party theuhah fimkhur turin kalkhawmte hi an inngen a ni.

He huna tarlan a nih danin raltlante tanpuina atan hian Lunglei Town Branch YMA ten sum Rs 180,000/- thawhkhawm tawhin YMA Sub-Hqrs Hnahthial hnenah Rs 150,000/- pek a ni bawk a, hei bakah hian Central YMA atangin mi pakhat tan Rs. 700/- hisap leh DC Office Lunglei atangin mi pakhat tan Rs. 300/- dawn a ni tawh bawk a, hei hi mi 167 hnenah sem a ni tawh bawk a. Heng bakah hian Thaizawl Raltlan Camp-a awmte bakah hmun hrang hranga raltlante eitur leh bungraw hmangin tanpuina pek an ni tawh bawk.