Provisional Employees ten sum renchem chhuanlama anmahni hrekna hlih thuai an phut thu an sawi
Mizoram sawrkar hnuaia a nghawt lova thawk te inzawmkhawmna, Provisional Employees Association of Mizoram te chuan sum renchemna chhuanlama sawrkar in a hrekna chu hlih thuai an phut thu sawiin, Dan hnuaia an hamthatna tihtawp a nih laia sawrkar hnathawk nget te hamthatna tihtawp a ni ve si lo chu an hriatthiam loh thu an sawi.
He thu hi nimin-a Aizawl Press Club-a thuthar thehdahtute an kawmna ah sawiin Provisional Employees Association of Mizoram hruaitute chuan Mizoram Sawrkar hnuaia Department hrang hranga thawk Provisional Employee hi tun dinhmunah mi 8500 vel an awm thu leh Provisional Employee te dahnghehna tur, Regularization Scheme pawh fel fai takin sawrkarin a siam sak tih an sawi a. Hemi hmang hian post ruak awm dan a zir leh regularization quota awm dan azirin an nghet ve bek bek zel tih sawiin, “Department tinah hah taka hlawh tlem zawka thawkin, nupui/pasal fanau hrawk chawmin a tam zawk phei chu mi In luaha chhungkaw enkawl tawk tawk kan ni a. Kan la ngheh ve hun thlirin nuam ti takin kan thawk ve zel a. Chutihlaiin Finance Department (Economics Affairs) in Austerity Measure tiin kan ngheh theih vena awm chhun chu min tihtawpsak ta hmiah mai,” tiin chutianga an ngheh vena tur an hrensak hnu kum khat pelh zet hnuah kum 10 service neite chu Seniority a an hmasak ber dan ang zelin regularization phalsak an ni ta tawk tih an sawi a. Hei hi chu mi tam zawkin an chhawr theih loh thu leh ‘Satahchhuak inpek’ ang chauh a nih thu sawiin, “A chhan pawh seniority a pakhatna kha kum 50 aia a upat loh chuan a hnung lamah kum 60 tling tep tawh pawh ni ila seniority a pakhatna kum 50 tling lo hian min dang vek tho a ni,” an ti.
Provisional Employees Association of Mizoram hruaitute chuan a ngheta an awm ve theihna dan avang hian an thiante mi tam tak, kum 60 an tlin avangin an maiparthlawn tawh thu leh chutiang tur chu tam tak an la awm mek thu an sawi a. “Hengte hian an thatlai hun kum 30 chuang teh meuh mai sawrkar tan an hun leh tha thawhin hlawh tlemte an la a. An chhuah a lo hun a, an hna an chawlhsan dawn thla hlawh beitham tak an lak bak chu hum haw an nei thei ta lo a ni. He Dan Sakei hi awm lo se, an nghet ve anga, tam tham ni lo mahse an chhungkaw enkawlna tawk afang chu an nei ve tur hi a ni a, a pawi hle a ni,” tiin he Dan hi hlih an duh thu an sawi bawk.
Austerity Measure in Provisional Employee nawlpuite a nghawng laiin, Austerity Measure hman tan 25/05/2020 atanga 31/12/2021 chhung khan Sawrkar chuan mi 498 te appointment a pe thung tih pawh thuthar thehdarhtute hnenah hian sawiin, heng te hi Group A-ah 76, Group B-ah 121, Group C-ah 254 leh Group D-ah 47 an ni tih an sawi a, “Hetiang te han thlir chuan Austerity Measure hian hmelhriat leh tihpuitu neite chu a dang ve lova, regularization dan beh mek pawh phelhsak an awm tih a chiang hle. Provisional Employees Regularization Scheme hi Finance Department hnuaia Economic Affairs (EA) khawih ni lovin DP&AR khawih a ni a, Finance hian an kuang lo an nawr bakah Council of Minister meeting thu pass palzutna a ni,” an ti.
Provisional Employees Association hruaitute chuan Austerity Measure hian Tlumtea thlira an lo thlir titawp siin regular te hamthatna - Promotion te, Financial Upgradation - MACP te, Time Bound promotion te a titawp ve chuang lo nia sawiin, Regular staff te an chanvo chhuhsak chu sawi loh an promotion hun kar khat leka pawhtlai pawh a nih loh thu leh a nghet leh a nghet lova sawrkar hna lak insum-karna a awm chuanloh thu an sawi a. “Austerity measure siam hnu hian He dan Sakei hi awmze nei lo, mi hnuaihnung zawkte chanvo rahbehna chauh a ni,” tiin hna hnuaihnung zawkte hrekbeh tlat chu hriatthiam har an tih thu an sawi bawk.