Zawlpui zau-ah kum hmasa aiin Buh thar a tlahniam

Serchhip Mat phai Zawlpui Zau-a Leilet nei-tute chuan nikum (2021) khan Buh phur 4774 an thar thu an sawi.

Serchhip Zawlpui Zau FMC hian nimin khan Chawngbuangi Memorial School Serchhip-ah Assembly vawi 37-na neiin kum kalta chhunga an buh thar dan hi an tarlang a, Zawlpui Zau bikah hian Leilet neitu chhungkua 56 an awm thu leh ram Hectare 125-a zau-ah Leilet hi siam a nih thu sawiin, nikum chhung khan Buh phur 4774 tharin hei hi Tin 14,322 a nih thu an sawi a, nikum hmasa (2020) khan phur 5131 thar niin kum hmasa aiin nikum-a buh thar hi phur 357 in a tlem zawk a ni.

Nimin a Zawlpui Zau FMC Assembly hi an Vice President Kapthianga chuan kaihruaiin an thurel zingah Tuilian laka invenna atan tui paihna siam tura hmalak aan rel bakah Buh phunna leh a ah-na khawl ngaihtuah nise an ti bawk.

Chawhnu lamah MJA Serchhip District kaihhruaina in hruaitu thlanna an nei nghal a, President-ah Zomuana Hnamte (Saron Veng); Vice President-ah Kapthianga (Chhim Veng) leh Treasurer-ah Sailopara Sailo (Leisang Veng) te thlan an ni a, heng mite hian an thawhpui tur Secretary te an ruat leh ang.