Tripura-a Bru te E. Roll a paih turin sawrkar ngen rel

Mizoram-a Tlawmngai Pawl hrang hrang inzawmkhawm, NGO Coordination Committee nimin-a thukhawm chuan Tripura-a awm tawh Bru te chu inthlanpui neih leh hma ngeia Mizoram Electoral Roll atanga paih an nih theih nana hma la turin Mizoram an ngen.

Central YMA Office, Aizawl-a NGO Coordination Committee thutkhawm nimin a neih chuan Mizoram atanga anmahni duhthu ngeia Tripura-a tlan thla Bru-te Mizoram Electoral Roll atanga paih chungchang hi an sawiho a, Tripura-a awm tawh Bru-te chu inthlanpui neih leh hma ngeia Mizoram Electoral Roll atanga paih a nih theih nana hma la turin Mizoram sawrkar ngen an rel a, sawrkar an ngenna chu Chief Minister Zoramthanga hnenah thlenin sawipui nise an ti.

NGO Coordination Committee thukhawm hian resolution siamin, Mizoram atanga anmahni duhthu ngeia Tripura-a tlan thla Bru zingah Mizorama rawn let leh duh an awm nia sawi chu tha ti lovin remchang lo ah an ngai tih an sawi bawk.

Thutkhawm an neih hnu a zawhna chhangin Central YMA President leh NGO Co-ordination Committee Chairman R. Lalngheta chuan Mizoram-a pawl hrang hrangin Bru-te Roll atanga paih tura an ngen laia Mizoram Electoral Roll tharah an la chuang leh ta chu tha lo an ti hle tih sawiin, Bru chungchangah hian Mizo-ram sawrkar chu a che chak tawk lova an ngaih thu he thutkhawm a tel te hian an sawi thu a sawi.