Chanchin lawrkhawm :

PAC thutkhawm neih a ni

Mizoram State Legislative Assembly hnuaia Public Accounts Committee chu nimin khan an Chairman Vanlalhlana MLA hovin Assembly Committee Room-ah thukhawmin Mizoram sawrkar sum hmanna leh hemi chungchanga enzui ngai te an thlirho a. Tun tum hi 8th Assembly chhunga PAC thutkhawm vawi 42-na niin PAC hian Comptroller & Auditor General of India report behchhanin sawrkar hnathawh hrang hrang, a bikin Department te sum hman dan kimchang a enzui thin a, tul leh tha a tih angin House kaltlangin sawrkarah rawtna te thlenin sawrkarin heng rawtna te a bawhzui dan pawh a vil zui thin a ni. PAC hi India ram Provincial Government awm lai kum 1921 December thla khan din a ni a, nikum Dec. ni 4 leh 5 khan Parliament Public Accounts Committe kum za tlinna chu India President hovin a lawmna neih a lo ni tawh a ni.


Mizoram-ah Omicron la hmu lo

Tunhnaia Social Media thenkhat-a Aizawl Veng pakhat-a COVID-19 hrik chhuak thar leh hmun danga leng mek ‘Omicron’ awm tawh anga thuthang awm chu Official Spokesperson for COVID-19 leh IDSP State Nodal Officer Dr. Pachuau Lalmalsawma chuan thu belhchian dawllo a ni tih nimin khan a sawi a. January ni 10, 2022 khan National institute of Biomedical Genomics, Kalyani, West Bengal-ah Genome Sequencing atan sample 95 thawn a nih thu leh result la dawn a nih loh thu sawiin, hemi tuma Sample thawnah hian Omicron hmuhna ni a sawi Veng atang hian sample thawn a awm lo tih a sawi bawk.


Mizoram atangin 1-na hauh

India ram State hrang hranga zirlaite intih-siakna ‘National Kala Utsav 2021’ tun thla ni 1 atanga 12 chhunga neih result puanchhuah takah Mizoram aiawha chhuak Lalruatfeli, Class IX, Kids Care School, Ramhlun South, Aizawl chu Visual Arts 3D painting-ah pakhatna niin Rs. 25,000/- bakah Certificate, Trophy leh Medal te a dawng a ni.


Minister in NGHAM kawm

Health Minister Dr. R. Lalthangliana chuan nimin khan a Pisa-ah Non-Government Hospital Association of Mizoram (NGHAM) hruaitute kawmin Mizoram-in COVID-19 hripui leng a dona kawnga theihtawp an chhuahna kawnga thahnemngai taka an puihna leh anmahni ham-thatna tur pawh tlansana Zoram mipuite himna tura NGHAM te hmalakna hi a chhuanawm a tih thu a sawi a. Zoram Medical College (ZMC) chu Dedicated COVID Hospital-ah an puan avangin COVID hri kai mekte bak an enkawl thei loh laia an hmalakna chu lawmawm a tih thu a sawi a. NGHAM hruaitute chuan COVID-19 hi kum engemaw chen a la cham bang dawna a lan avangin Long-Term Plan siam tul an tih thu an sawi bawk.


Pawikhawihtu hrem phut

MZP General Hqrs. chuan niminpiah zing dar 8:00 vel khan Tuizual Zau, Muallungthu ramah Jovel Molsom (23), Boktomohon, Gomati District, Tripura a cheng chu a ruang chhar a ni tih sawiin, he thil thleng hi tun Pathianni-a thleng nia hriat a nih thu leh pawikhawihtu nia rinhlelh hi Raju Singh (33), Tuipuibari khua a ni tih an sawi a. Mizoram Police ten hun reilo te chhunga pawikhawihtu misual an chhui-chhuak leh an man chhuak chu lawmawm an tih thu sawiin, pawikhawihtu chungah hian a phu tawk hremna lek tura thuneitute an ngen thu an sawi bawk. Jovela hi Zohnahthlâk, Tripura a khawsa niin Mizoram-ah inhlawhfa in mi huan enkawlin a awm niin an sawi bawk.


Champhai NGO in sawiho dawn

Tunhnaia Champhai District Bawrhsap sawn a nih chungchanga Champhai-a NGO hrang hrang te thukhawm in an District Bawrhsap sawnna tur Order sut leh tura Cheif Minister hnena ngenna an thlen chu an huntiam, nimin tlai thlengin tih hlawhtlin a nih tak loh avangin Vawiin hian Champhai-a tlawmngai pawl hrang hrang hruaitute chu an thukhawm leh dawn a. Champhai DC sawn chungchanga hmalak zel dan tur bakah Champhai District Hospital-a RT-PCR khawl bun chung-chang pawh an sawiho nghal ang.

Comments

Popular posts from this blog