Kum 15 chin chunglam Vaccine pe in kum 18 chunglam te pawh pek leh an ni dawn

Serchhip District chhunga kum 15 atanga 18 te hnenah nimin atang khan COVID-19 Vaccine pek tan a ni a, nikum lama vaccine la tawh te hnenah karleh atang khian Precaution Dose pawh pekchhuah tum a ni.


Serchhip District a kum 15 -18 te hnena COVID-19 Vaccine pek hna kalpui tan pual hian nimin chawhma dar 11:00 khan Presbyterian English School New Serchhip-a Vaccination Centre-ah a hawnna neih a ni a, he hunah hian District Bawrhsap Kumar Abhishek IAS chuan tleirawl leh rawlthar te hnena COVID-19 Vaccine pekchhuah theih a ni ta chu lawmawm a tih thu sawiin, vaccine te hi zirchianna leh enchhinna neih hmasak vek a nih avangin lak a him tih a sawi a. Hri danna chu hri laka himna atana hmanraw pawimawh leh hri leng doletna atana tangkai a nih avangin a la thei chin te chuan an lak vek a pawimawh thu sawiin, hri danna la tura kal te pawh ah thiante leh chhungte zinga hri danna la thei te chu hri danna lak pawimawh zia lo hrilha lak tir theuh turin a chah bawk.

District Surveillance Officer Dr. Lalngaihawmi Chhangte kaihhruai he hunah hian Serchhip CMO Dr. Lalzawmi pawhin kum 15-18 te hnena vaccine pek hna hi tun thla ni 3 khan Aizawl-ah bul tan tawh a nih thu leh tunah hian District hrang hrangah kalpui chhunzawm mek a nih thu a sawi a. COVID-19 hri leng hian ziaawm lam a pan a nih loh chuan Vaccination Certificate pawh ala pawimawh chho zel dawn tih a sawi. Mizoram chuan vaccine pek kawngah nasa taka hma a lak thu sawiin Serchhip CMO chuan, kum 18 chunglam zingah hri danna la thei zinga za zel 94.8 te chuan Dose khatna an lak tawh thu a sawi a. Tunah hian kum 18 chunglam tan Booster Dose an tih, Precaution Dose chu pek-chhuah tan leh a nih dawn thu sawiin, Vaccine 2nd Dose lak atanga thla kua (9) a ral tawh chuan Precaution Dose hi lak theih a nih dawn thu leh tun thla ni 10 atangin pek tan leh a nih dawn thu a sawi a. 2nd Dose la tawh zingah hri danna an lak atanga thla 9 la tlinglo te tan ala lak theih dawnloh thu a sawi bawk.

Serchhip District-ah hian kum 15-18 inkar mi 3608 te hnenah COVID-19 Vaccine hi pek tura ruahman a ni a, amaherawh chu kum 15-17 te hnenah COVAXIN pek tur niin kum 18 chin te hnenah Co-vishield pek tur a ni a, ni 28 hnuah 2nd Dose pek leh tur an ni dawn a, nimin khan mi 739 hnenah Vaccine hi pek a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar