Nikum chhungin Serchhip District-ah HIV hrik pai mi 57 hmuhchhuah an ni

Kum kalta chhung khan Serchhip District Hospital-a Integrated Counseling and Testing Centre (ICTC) atanga thisen endik mi 3021 atangin HIV hri kaimi 57 hmuhchhuah an ni.

Thudawn danin kum kalta chhunga ICTC Serchhip-a thisen endik mi 3021 atang hian mi 2140 chu mipui tlanglawn (General Client) niin midang 881 hi raipuar (ANC) an ni a, General Client mi 2140 thisen endik atangin HIV hri kai mi 52 hmuhchhuah an ni a, ANC mi 881 thisen endik atang hian HIV hrik pai mi 5 hmuhchhuah an ni thung. Nikum lamah hrileng avangin kumdang angin thisen enfiah hi tam tawk lo mahse thawktute chuan an thisen enfiah zat atanga chhutin Positive Rate erawh a sawng viau tho niin an sawi.

Serchhip District Hospital ICTC hi kum 2003 April atanga hawn niin hemi kum July thla atangin thisen enfiah hna hi mumal taka thawh a ni a, heta tanga Test neih tawh zawng zawng zat chu mipui tlanglawn ah mi 19,924 niin heng atangin HIV hrik pai 352 hmuhchuah an ni a, raipuar mi 10,643 endik atangin HIV hrik pai mi 81 hmuh-chhuah an ni tawh bawk a, a pumpuia chhutin Serchhip ICTC atang hian mi 30,567 te thisen enfiah tawh atangin HIV hrik pai mi 433 hmuh-chhuah an ni tawh a ni.

Serchhip District Hospital ICTC a thawk-tute chuan Serchhip District-a HIV hrik kai pung chak tak chu anmahni mai a an do zawhloh thu leh anmahni thawhpuitu leh tawiawm thintu Department hrang hrang chungah lawmthu an sawi a, thawkho zel tura sawmin, kumin chhung hian nasa zawka hma lak chhunzawm zel an tum thu leh khawtlang mipuite pawh kan tanrual a tul thu an sawi bawk.