Bawrhsap kalchhuak tur in MJA te a kawm

Serchhip District Bawrhsap Kumar Abhishek IAS chuan nimin khan Mizoram Journalists' Association (MJA) Serchhip District member te chu a Pisa-ah inthlahna hun a hmanpui.

Serchhip District Bawrhsap Kumar Abhishek hi Delhi-a awm tura sawn niin karleh tirlam khian Serchhip a chhuahsan dawn a, nimin a MJA Member te nen inkawmna an neih ah hian District Bawrhsap chuan Serchhip Bawrhsap hna a thawh chhunga Journalists hote thawhpuina tha tak a dawn thin avangin lawmthu a sawi a, mipuite tan hna tangkai tak an thawk nasa hle tih hrilhin, an hma lam hunah pawh thahnem ngai taka bei chhunzawm zel turin a chah a ni.

Serchhip District mipuite an thain kaihhruai an nuam em em tih Bawrhsap chuan sawiin, chutihrualin hmasawn an mamawhna laite pawh a awm ve bawk a, a bikin mipuiten zirna leh hriatna lama hma kan sawn zel a tul a, vantlang hriselna kawngah pawh hmasawnna tur kan la ngah hle bawk a ni, a ti a. Heng kan hmasawn zel theihna kawngte hi nasa taka lo umzuia lo bei zel tura ngenin a chah bawk.

He hunah hian MJA Serchhip District President Kapliana Pachuau chuan Bawrhsap hi MJA aiawhin ngaihhruina thilpek a hlan a, Kumar Abhishek chu a theihna zawng zawnga Serchhip District tana thawktu, hruaitu fel tak nia a hriat thu a sawi a. A hmalakna zarah CSR Fund tam tak kan hmu ringawt pawh hi nakin thlenga hriatreng tlak a ni, a ti a. Serchhip District tana a inpekna zawng zawngah lawmthu hrilhin, a hnathawh zelna turah duhsakna a hlan a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man