Nikum-ah Mizoram buh thar a pung hret

Kum liamta 2020-2021 a Mizoram buh thar zat chu MT 62,182 a ni a, hei hi kum hmasa lam aiin MT 1,943 in a tam a, District hrang hrang zingah Champhai District chu buh thar tam ber an ni.

Agriculture Department-in January 6, 2022 thlenga an chhinchhiah chinah, kum liam ta 2020-21 chhunga Mizoram buh thar zawng zawng MT 62,182 atanga MT 25,409 chu tlangram loneih (Jhum) atanga tharchhuah a ni a, MT 35,791 chu leilet WRC (Kharif) atanga thar niin, WRC (Rabi) atangin MT 982 thar a ni bawk. District 11 zingah Champhai District chu buh thar tam ber an nih laiin, Hnahthial District chu buh thar tlem ber an ni.

Kum liam ta 2020-21-ah buh chinna atan hectare 35,246-a zau hman niin, chu Jhum (Kharif) atan hectare 19,080-ah buh chin a ni a, WRC (Kharif) ah hectare 15,696 leh WRC (Rabi) atan hactre 470-a zauah buh chin a ni bawk. Kum hmasa 2019-2020-a Mizoram buh thar zat chu MT 60,239 a ni a, hemi kum aia nikum-a buh thar tamna chu MT 1,943 a tling a. Hetihlai hian 2018-19-a Mizoram buh tharchhuah zat chu MT 60,010 a ni.

Mizoram in a tlem berah kum khat chhunga buh a mamawh zat chu MT 1,80,000 vel a tling a, Remote Sensing & Geographical Information System (GIS) hmanga mi thiamte chhut danin Mizoram-ah leilet siam theih ram zawl hectare 77,466 (0.25%) a awm a, chung zinga hectare 16,166 chauh 2020-21 thleng khan hman tangkai a la ni.