Mizoram-a Vaccine hrang hrang pek mek dinhmun thlirhona neih a ni

State Task Force on Immunization chu nimin khan Aizawl-ah thukhawmin Mizoram-a COVID-19 Vaccine pek mek dinhmun leh vaccine dang pek thin kalpui zel dan turte an sawiho.

Directorate of Health & Medical Education (DHME) Conference Hall Aizawl-a State Task Force on Immunization thutkhawm hi an Chairman leh Health Secretary R. Lalramnghaka chuan kaihruaiin COVID-19 vaccine pek hna kalpui mek chungchang te, Pulse Polio Vaccine, Routine Immunization leh kumin-a Mission Indradanush neih hmabaka hmalak dan tur chungchang sawiho a ni a. Covid-19 vaccination hi Mizoram chhungah chak taka kalpui mek zel niin January ni 16 thleng khan kum 18 leh a chunglam ah mi 7,40,326 te chu Dose 1-na pek ni tawhin hei hi pek tur zat atangin zaa 96 a ni a, 2nd Dose pawh mi 6,03,941 pek ni tawhin, hei hi pek tur zat atangin zaa 78 a ni. Hei bakah hian kum 15-17 inkarte pawh Covid-19 vaccine, COVAXIN pek zel an ni a, kum 15-17 inkarah hian 1st dose hi 33,849 pek a ni tawh a, hei hi pek tur zat atangin za zelah 51 a ni.

Mission Indradanush hi December 25, 2014 atang khan India ram pumah kalpui tan a ni a. Naupang kum 2 hnuailam leh nu naupai ten a hun dik takah hri danna an lak theih nana beihpui thlakna a ni. Intensified Mission Indradanush 4.0 chu February ni 7, 2022 atangin beihpui thlak tan a ni dawn a, hri danna an dawn tur ang la dawng lo naupang kum 7 hnuailam an awm chuan a tul anga pek zel an ni bawk ang.

Pulse Polio Immunization (zeng hri danna) pek beihpui hi kumin ah March ni 1 atanga ni 3 chhung neih tur a ni a, naupang kum 5 hnuailam te chu Zenghri danna (OPV Vaccine) pek vek tur an ni. March ni 1-ah hian Veng/khua tinah hmun hrang hrangah vaccine pekna Booth-ah pekchhuah a ni ang. Vaccine pekna hmun tur hi Veng tinah hriattir leh a ni ang. Mizoram leh India ram pumah zeng hri hi umbo ni tawh mahse ram thenawm Pakistan leh Afghanistan-ah te a la awm avang leh inkaihdarh a awlsam em avangin Polio Vaccine hi ngawrh takin, a hun biah pek chhuah zel a ni.

Sawrkai laipui chuan thla tin Health Sub-Centre ah Routine Immunization kalpuiin naupang leh nu naupai te tan Vaccine chi hrang hrang a pe thin a. Covid avangin hmun tam takah he Routine Immunization hi a khaihlak thin a, hei hi nimin-a State Task Force on Immmunization Committee thukhawm chuan a hunbi anga tluang taka kalpui a nih theih nan Veng/Khaw tina Village Health Nutrition and Sanitation Committee te chu uluk taka lo enpui thin turin a ngen a. Covid Appropriate Behaviour zawm harsatna hmun Health Sub-Centre-ah te chuan Routine Immunization him taka kalpui a nih theih nan hmun remchang zawk YMA/Local/Village Council-te nen ruahmanna siam turin a ngen bawk a ni.

Comments

Popular News (Last 30 Days)

Vawiin-ah HSSLC Exam result