Assam Rifles-te Zokhawsang-a an insawn theihna turin inbuatsaih mek zel a ni - Tawnluia

MNF Sr. Vice President leh Deputy Chief Minister ni bawk Tawnluia chuan Assam Rifles-te Zokhawsang-a an insawn theihna turin inbuatsaih mek zel a ni tih sawiin, “An chhuahsan ram hi mipui vantlang tan liau liau kan hmang tur a ni,” a ti.

Kumthar atana Aizawl-a Mizo Hnam Run hawnna nimin-a neih ah MNF Sr. Vice President Tawnluia chuan he thu hi sawiin khawpui laili atanga Assam Rifle sawn chhuahna turin Pu Laldenga hunah Zokhawsang hmun pek an ni daih tawh tih sawiin, “Kum 10 Congress khan an ngaihsak lova, Pu Rama sawrkar lo dingin ngaihtuah a ni a, nawr leh a ni. AR-te hi chhuak thei turin an inbuatsaih mek zel a ni. An chhuahsan ram hi mipui vantlang tan liau liau kan hmang tur a ni,” tiin MNF sawrkar hmasa khan Dan-ah an dah nghet tawh tih a sawi a. “Assam Rifle-te hi an chhuak ngei ang,” tiin MINECO pawh MNF sawrkar hmasa a AR ram chhuhsaka din a ni tih a sawi bawk.

Mizo mipuite hmun tina awm leh State pawna awm rorelna pakhat hnuaiah dah chu MNF thil tum a ni tih pawh Tawnluia chuan sawiin, “Party dang anga lalna leh thuneihna ringawt um a, lal theihna leh thuneihna um ringawt thei kan ni ve lo. Pathian hming lam chungin kan thawk mek zel a ni. Chak loh chang nei mah ila Pathian hmanrua ni turin kan kal mek zel a ni,” a ti bawk.

MNF Sr. Vice President Tawnluia chuan, “MNF Party chuan Vawiin ah hian kan thiamna te, kan finna te, kan chakna te, kan chhuang thei lo. Pathian hming lam chung zelin kum tharah hian Mizo hnam dinchhuahna atan kan inpumpek kumah i hmang lehzual ang,” tiin “He hripui dona leh development kal zelnaah hian mipuite min tawngtaipui a, min thlawp tlat turin kan ngen a. Sawrkar min thlawp tawhnaah thinlung takin lawmthu kan sawi tak meuh meuh a ni,” a ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man