Mizoram Rajya Sabha MP in Buarchep leh Saihapui V-a Police duty te a tlawh

Mizoram Rajya Sabha MP K. Vanlalvena chuan nimin khan Mizoram leh Assam ramri buaina avanga Buarchep-a Mizoram Police te inkulhna hmun thenkhat leh Saihapui V-a Police te a tlawh kual.

Ramri-a Duty Police te hian Rajya Sabha MP hnenah hian an mamawh hrang hrangte an lo thlen a, heng zinga pakhat, Tlang-II a Power Supply la lut lo chungchangah P&E Minister R. Lalzirliana nen phone hmanga inbe nghalin, a ranglama tih nghal an tum thu an sawi. Rajya Sabha MP hian Saihapui V-a kuhva huan neitu pakhat Assam Police ten kuhva lawh an phal loh chungchangah media mite zawhna chhangin, Assam ram a ni emaw, Delhi pawh nise Mizote hian ram kan nei thei tih sawiin, tuna kuhva huan awmna lai chu Assam lamin an ram chinah pawh lo ngai se Mizoten ram kan nei thei a, kan thlai rah pawh kan lo thei tiin, hmalakpui a tul thu a sawi bawk. MP hian Vawiin hian Aitlanga Police inkulhna te tlawh leh a tum a ni.

Kolasib District chhunga Saihapui V khua a cheng Vanlalhruaia kuhva chu kumin hian Assam Police ten a rah lawh phal lovin mi dang pahnih- F. Malsawma leh Vanrammawia te kuhva huan pawh Assam Police te hian enkawl leh sam fai an phalsak lo bawk a. Vanlalhruaia hian kum danga a lo tih thin angin a kuhva rah hi kum kalta khan hnamdang mi pakhat hnenah cheng nuai khat in a hralh a. Hetianga Assam Police ten kuhva rah lawh an phalsak tak loh avang hian kuhva rah hralhtu hian a pawisa lo pek tawh hi a pe let tawh nghe nghe a ni. Saihapui V khaw tlawhtu Kolasib chanchinbu thenkhatte hnenah Saihapui V VCP VL. Zawna leh kuhva huan neitu Vanlalhruaia te chuan Pu Vanlalhruaia kuhva rah hi Assam Police te phalna in hnamdang miten a rah tla an chhar in, an lo thin tih an sawi thung.

Saihapui V khua a cheng F. Malsawma kuhva phun thar kung 4000 leh Vanrammawia kuhva phun thar kung 2000 vel chu Assam Police te hian nikum atang tawh khan enkawl leh samfai an phallo a, heng kuhva huan pahnih te hi tunah chuan a hnim tawh hle a. Phainuam Buarchep a cheng Lalnuntluanga Sangha dil chu nikum atang khan Assam Police ten enkawl an phalsak lo bawk a, kum tawpa Sangha Dil sah an tum pawh in an phalsak lova, Lalnuntluanga Sangha Dil hi Assam Police ten sah in, Sangha pawh an man vek tawh tih hriat a ni bawk a. Sangha Dil bula a Kuhva huan pawh Assam Police te hian tlawh an phalsak lo bawk a ni.