Hri kai enkawllai sang ruk aiin tam leh tawh

Niminpiah khan Mizoram-ah COVID-19 hri kai hmuhchhuah tlahniam hretin Sample enfiah 4323 atangin hri kai 880 hmuh an ni a, Sample enfiah atanga za zela 20.36 zetin hri an kai thung a, hri kai enkawllai pawh mi sang ruk aiin an tam leh tawh a ni.

Niminpiah khan ZMC-a RT-PCR Laboratory-ah Sample 398 enfiah niin heng atang hian hri kai mi 63 hmuh an ni a, an vai hian Aizawl District atanga Sample lak te niin Veng leh khua 25 atanga hri kai hi hmuh an ni. Fluorescent Immunoassay Test hmangin Aizawl District-ah hian Sample 25 leh Serchhip District atangin Sample 38 enfiah a ni bawk a, heng atang hian hri kai mi 24 zet hmuh niin an zinga 20 te chu Serchhip District ami te an ni a, midang 4 te hi Aizawl District ami te an ni thung.

District hrang hrang 6-a TrueNat Laboratory-ah niminpiah khan Sample 96 enfiah niin hri kai mi 21 hmuhchhuah an ni bawk a, an zinga 14 te chu Mamit District ami te niin Kolasib District-ah 3, Serchhip District-ah 2 leh Lunglei leh Saitual District-ah pakhat ve ve an ni.

Rapid Antigen Test hmangin niminpiah khan Sample 3766 enfiah ni leh bawkin hri kai mi 772 hmuh an ni a, an zinga 181 te chu Saitual District-a hri kai hmuh te niin Aizawl District-ah 158, Serchhip District-ah 138 Khawzawl District-ah 116, Champhai District-ah 53, Lunglei District-ah 38, Mamit District-ah 37, Siaha District-ah 19, Kolasib District-ah 18, Lawngtlai District-ah 9 leh Hnahthial District-ah 5 te an ni.

Nimin khan Mizoram-a hri kai enkawl mi 296 te chu anmahni enkawlna hmun atanga chhuahtir an ni ve leh bawk a, heti hian nimin tlai thlenga Mizoram-a hri kai hmuhchhuah tawh chu 1,48,438 niin an zinga 1,41,531 te chu enkawl dam ni tawhin hri kai zinga za zela 95.35 te chu enkawl dam an ni tawh a, hri kai enkawllai mi 6343 la awmin hri kai te zingah mi 564 an boral tawh bawk a, nimin khan hri kai boral chhinchhiah belh an awm lo a ni.