Mizoram-a NIT ram chungchanga harsatna sawiho

National Institute of Technology (NIT) Mizoram tana Lengpui a ram pek, ram buai avanga hmalakna chhunzawm theihloh leh khaihlak mek chungchang chu nimin khan Higher and Technical Education Minister Dr. R. Lalthangliana hovin a Pisa-ah sawiho a ni a, he hunah hian Higher & Technical Education Department leh Environment, Forests & Climate Change Department bakah NIT Mizoram hotute an tel a ni.

He sawihona ah hian H&TE Minister Dr. R. Lalthangliana chuan NIT Mizoram Campus, Lengpui chu Zoram, thangtharte, kan tu leh fate tana rotling tur leh hlu tak a nih vangin a nih tur ang taka rang taka puitlin tir hi kan tih makmawh a ni a, hemi kawnga tangkai tur sawrkar department zawng zawngte pawhin a hlawhtlin nan harsatna awm thei zawng zawgte pawh Mizoram dah hmasa chunga tun aia nasa lehzuala hma an lak pawimawh hle tih sawiin, “Engti kawng zawng pawhin tihhlawhtlin hi kan tum tur a ni,” a ti a. NIT Mizoram chu Mizoram rohlu tur a nih avangin EF&CCC Department, Higher & Technical Education Department leh NIT te chu tunkar chhunga dawhkan khat kilho a thukhawm turin leh harsatna awm theite chingfel zung zung turin a hrilh a ni.

He thutkhawm ah hian NIT, Mizoram Campus, Lengpui-a mi chu Riverine Forest Reserve Area a nih vanga Forest Clearance dil a ngaih avanga hmalak ngaite sawiho a ni a, Forest Clearance dilna nikum November thla a Higher & Technical Education Department in an thehluh tawh chu a Concerned Department lamin bawhzui chak se an duh thu sawilan a ni.

He hunah hian PCCF Jitendra Kumar pawhin NIT ram Riverine Fortest Reserve hnuaia a awm chinfel chungchang chu a ngaih pawimawh thu sawilangin, Mizorama a rawn awmna a la rei loh thu a sawi a, Minister-in thahnemngai taka a kokhawm chu thil lawmawm tak a ni tih sawiin, theihtawp chhuaha Mizoram rohlu tur a hlawhtlin theihnan tan lak a tum tih a sawi a, tunkar chhunga a Concerned Department te nen Minister duh dan ang ngeia chinfel ho dan tur zawn a chu tha a tih thu a sawi bawk.

NIT Mizoram hi kum 2010 atangin Chaltlang, Aizawl-ah mimal building luah hawhin bultan a ni a, tunah hian Academic Department paruk (6)- Electricals & Electronics Engineering; Electronics & Communication Engineering.“3; mputer Science & Engineering; Mechanical Engineering.; Civil Engineering leh Basic Sciences, Humanities & Social Sciences te a awm a. Tun dinhmunah NIT Mizoram-ah hian zirlai 670 awm mekin zirtirtu 25 an awm a, Non-Teaching Staff 18 an awm bawk a ni.