Sainik School hotu ten Mizoram Governor hnenah sum lamah an harsatna an sawi

Sainik School, Chhingchhip hotute chuan nimin khan Mizoram Governor Dr. Hari Babu Kambhampati chu Raj Bhavan-ah hmuin an School hmasawnna hrang hrang an sawipui bakah an hmachhawp te an sawipui.

He inkawmna ah hian Governor Hari Babu Kambhampati chuan Mizoram-ah Sainik School kan nei chu thil lawmawm tak a nih thu sawiin, Sainik School hotute chu India ram hmundanga Sainik School te aia tha zawk Mizoram in a neih theih nan tan la zel turin a fuih a. An hmasawnna te leh an mamawhte pawh zawtin a remchan dan anga theihtawp a lo chhuahpui tur thu a sawi a ni.

He hunah hian Sainik School Chhingchhip-a Principal Wg.Cdr Sharul Hameed leh Vice Principal Maj. S.Kalyan te pawhin Sainik School Chhingchhip chuan hun reilote chhungin nasa takin hma a sawn thu an sawi a. Tunah hian Pawl 6 atanga pawl 10 thleng zirna kalpui mek tih tarlangin, Zirlai 300 an neih mek thu leh hun reilote hnuah pawl 11 leh 12 zirna hawn belh tum a nih thu te, chumi hunah chuan zirlai awm thei zat 420 an neih an rin thu te an sawi bawk a. India rama Sainik School 33 zingah h Sainik School, Chhingchhip chu Hmeichhe naupangte luh ve theih nana bul tanna hmun a ni tih an sawi a. Tunah hian Sainik School dangah te pawh Hmeichhe naupang tan admission hawn tan mek a nih thu leh Sainik School, Chhingchhip-ah hian tualchhung mite tan 67% seat hauh a ni a, 33 % chu pawnlam mi te tan a dil theih a ni tih an sawi bawk.

Sainik School Principal chuan School chhung hmuhma chei leh siamthat hna chu State sawrkar kut a nih thu sawiin, Mizoram sawrkar atanga School cheibawl hna thawhna sum an dawn thin thu a sawi a, tunhnai deuh atang khan he tanpuina sum hi an dawn tawh lo thu sawiin, State danga Sainik School te ruala ke pen ve thei tur te leh hmunhma tha zawk nei tur chuan theihtawp chhuaha tan lak a hun tawh thu a sawi a. State sawrkar atangin Sainik School, Chhingchhip cheibawlna tur pawisa pawh a hma thei anga dawn an mamawh tawh hle tih sawiin, hemi chungchang ah hian Governor chu theihtawp chhuah sak turin an ngen nghal bawk a ni.