Mizoram-a COVID-19 hri kai nuai 1.5 aiin tam tawh

Niminpiah khan Mizoram-ah COVID-19 hri kai mi 1046 zet hmuh belh leh an ni a, Mizoram-a hri kai hmuhchhuah tawh zawng zawng chu mi nuai khat leh sing nga aiin an tam tawh a ni.

Niminpiah khan Mizoram pumah Sample 7282 enfiah niin heng atang hian hri kai mi 1046 hmuhchhuah an ni a, Sample enfiah atanga za zela 14.36 te chuan hri an kai a, ZMC-a RT-PCR Laboratory-ah Aizawl District-a Sample lak 426 enfiah niin hri kai mi 97 hmuh an ni a, Aizawl leh Serchhip District atanga Sample lak 86 te chu Fluorescent Immunoassay hmanga enfiah ni bawkin hri kai mi 15 zet hmuh an ni a, an zinga 8 te hi Serchhip District-a Sample lak niin Thenzawl khua vek an ni a, Aizawl District atangin hri kai mi 7 hmuh an ni bawk.

District hrang hranga TrueNat Laboratory-ah Sample 138 enfiah niin heng atang hian hri kai mi 41 hmuh an ni a, an zinga 19 te hi Mamit District ami te niin Kolasib leh Hnahthial District-ah 7 ve ve, Champhai District-ah 4, Serchhip District-ah 3 leh Khawzawl District-ah pakhat an ni bawk.

Rapid Antigen Test hmanga niminpiah-a Sample enfiah 6632 atangin hri kai mi 893 hmuh an ni a, an zinga 202 te chu Serchhip District ami te niin Aizawl District-ah 170, Khawzawl District-ah 123, Hnahthial District-ah 111, Lunglei District-ah 94, Saitual District-ah 58, Champhai District-ah 48, Mamit District-ah 38, Kolasib District-ah 26, Saiha District-ah 17 leh Lawngtlai District-ah hri kai mi 6 hmuh an ni bawk.

Nimin khan Mizoram-ah hri kai mi 373 te enkawl dam an ni ve leh bawk a, heti hian nimin tlai thlenga Mizoram-a hri kai hmuh tawh chu 1,50,538 niin an zinga 1,42,287 te chu enkawl dam an ni tawh a, hri kai hmuh atanga za zela 94.52 te enkawl dam ni tawhin hri kai enkawllai 7685 an la awm a, nimin-ah hri kai boral mi pakhat awm belh lehin Mizoram-a hri kai zingah mi 568 an boral tawh a ni.