Mizoram-ah kum 15 chin Vaccine pe tan

Ramchhung hmundangte rualin nimin atang khan Mizoram-a kum 15 leh 18 inkar te hnenah CO-VID-19 Vaccine chu pekchhuah tan a ni ta.

India Prime Minister Narendra Modi-a’n a lo puan tawh angin nimin khan India ram pumah kum 15 – 18 inkar te tan COVID-19 vaccine pekchhuah tan niin Mizoram ah chuan Health Minister Dr. R. Lalthangliana hovin PC Girl’s School, Mission Veng-ah vaccine pek-chhuah puala inkhawm neih a ni a. He hunah hian Health Minister chuan thalai tha za leh ngal chak zawkte tana Vaccine pekchhuah a ni ta chu lawmawm a tih thu leh hun rei tak atanga an lo nghahhlelh tawh a nih thu a sawi a, zirlaite tan a bik takin phai lama zirna chhunzawm tumte tan vaccine lak theih a ni ta hi a tangkai hle dawn a ni, a ti. Kum 15 – 18 inkarte zinga a tam ber hi zirlaite an nih a rinawm avangin zirna In behchhan ang zawnga vaccine pek hna kalpuite a that a rin thu a sawi bawk.

He hunah hian Dr. Eric Zomawia, Mission Director, National Health Mission, Mizoram chuan kum 15 - 18 inkarte tan sawrkar laipui in Covaxin a ruahman thu sawiin, India ram pumah January ni 2, 2022 (Sunday) atanga pek tan tur tih a ni a, Covaxin hi December 30, 2021 khan dose 67,000 Aizawl a rawn thleng a, Mizoram-ah chuan hun a tepter bakah chawlh te a nih avangin Aizawl-ah chauh nimin ah pek a nih thu leh, District dang te pawhin vaccine hi lain tunkar tawp lam hi chuan an pechhuak theiin a rinawm tih a sawi bawk.

Mizoram-ah hian kum 15 – 18 inkar vaccine la thei hi mi nuai 1 bawr vel an awm nia chhut an ni a, vaccine dose mamawh zat hi sawrkar laipui atang dawn belh zel tur a ni a, Covaxin hi first dose an lak atanga ni 28 ah second dose lak leh tur a ni. Covid vaccine pek chhunzawm zel dan turah chuan District tina District Immunization Officer te'n ruahmanna an siam anga, kum 15 – 18 inkar Covaxin la te hian vaccine chi dang an lak a rem lova, chutiang bawkin Covishield lo la tawhte pawhin second dose atan vaccine chi dang lak a rem lova, vaccine pekna hmun ah hian kum 15 – 18 inkarte tan leh kum 18 chunglam te vaccine pekna hmun a hranpa a siam tur a ni.

January ni 10, 2022 (Thawhtanni) atangin India sawrkar chuan Healthcare Worker, Frontline Worker leh Kum 50 chin chunglam natna benvawn (Comorbidities) neite zinga vaccine dose hnih la tawhte tan “Precaution dose” pe tan turin ruahmanna a siam a, heng Group 3 te zinga precaution dose dawng thei turte chu vaccine vawihnih an lakna atangin thla 9 (Ni 270) a liam tawh chin an ni. Healthcare workers leh Frontline workers te chu Co-WIN ah register sa vek an ni a; kum 60 chunglam comorbidities nei, Precaution dose la duhte chuan anmahni doctor theuh an rawn ang a, an doctor in la tura thurawn a pek chuan an la thei ang.